“Əslində o quruma üzv olmaq marağında deyildim. Bir gün zəng vurub dedilər ki, səni Azərbaycan Yazıçılar Birliyinə üzv seçmişik. Onda hələ rayonda yaşayırdım. Oğlum Bakıda tələbə idi və gedib üzvülük vəsiqəmi o götürdü. İnanırsız, ayrı-seçkiliyə, saymazyanalığa görə, AYB-dən tamamilə iyrənmişəm. Mən kağız üzərində AYB üzvü olsam da, özümü heç o qurumun üzvü saymıram. O quruma üzv olmaq, onun vəsiqəsini daşımaq mənim nəyimə lazımdır”. Bu sözləri baki-xeber.com-a Azərbaycan Yazıçılar Birliyinin (AYB) üzvü, adı AYB tərəfindən üzvlük haqqı ödəməyənlər siyahısına salınan şair Adil Cəfakeş bildirib.
2007-ci ildən AYB-yə üzv seçildiyini deyən A.Cəfakeş qeyd etdi ki, bu qurumdan narazılığını daim dilə gətirib və bu barədə sosial şəbəkə hesabında yazıb. “Mənə o qurumun heç bir faydası olmayıb, təqaüd verməyiblər, ad günümdə heç adımı çəkən belə olmayıb. Məni ümumiyyətlə o qurumda “yox” kimi görüblər. Ona görə də AYB üzvlüyündən çıxmağım barədə çoxdan o quruma ərizə vermişəm. Görünür çıxarmayıblar ki, adımı o siyahıdadır. Halbuki elə bilirdim ki, oranın üzvü deyiləm, məni AYB üzvlüyündən çıxarıblar”.
2022-ci ildə AYB-nin sonuncu qurultayından əvvəl birlik üzvlüyündən çıxmaqla bağlı ərizə yazdığını deyən A.Cəfakeşin sözlərinə görə, etinasız münasibət, laqeydlik onu bu addımı atmağa vadar edib.
“Ümumiyyətlə, çox laqeydlik, ayrı-seçkilik var. Dəfələrlə AYB sədrinin qəbuluna düşmək istəmişəm, amma imkan verilməyib. Halbuki, birliyin üzvü kimi mənim də çox şeyə haqqım çatır. Amma etinasız münasibətlə qarşılaşdım həmişə. Bir qəzetdə, bir jurnalda bir şeirimi belə çap etməyiblər, dəstəklərini görməmişəm. AYB-nin mənim üçün heç bir faydası yoxdur.
Üzvülük haqqı məsələsinə gəlincə, mənə faydası dəyməyən quruma nəyə görə üzvlük haqqı ödəməliyəm? Çıxarırlar çıxarsınlar, onsuz da AYB üzvlüyündən çıxmaqla bağlı çoxdan ərizə yazıb vermişəm”-deyə A.Cəfakeş bildirdi.
Qeyd edək ki, Azərbaycan Yazıçılar Birliyində (AYB) təmsil olunan, lakin üzlük haqqını ödəməyən şair və yazıçıların adlı siyahısını tərtib edib. Həmin şəxslərə fevralın 1-dək vaxt verilib. Əgər onlar üzvlük haqqı borclarını ödəməsələr AYB-dən xaric ediləcəklər. AYB-yə üzvlük haqqı illik 15 manatdır.
İradə SARIYEVA
