Aydın Xan Əbilov: “Birliyə üzv olmağa can atanlar bir ildən sonra üzvlük haqqı olan 15 manatı ödəməkdən imtina edir”
“Üzvlük haqqı ödəməyənlər Azərbaycan Yazıçılar Birliyindən (AYB) xaric ediləcəklər”. Bu barədə media nümayəndələrinə AYB sədri yazıçı Anar məlumat verib. O qeyd edib ki, beş ildən artıq üzvlük haqqı ödəməyən şəxslər AYB-dən çıxarılacaqlar.
Bununla bağlı sonuncu dəfə bu gün (9 yanvar) rəsmi yazılı xəbərdarlıq da elan olunacaq: “Üzvlük haqqını bir il, iki il, üç il və dörd il ərzində ödəməyənlərin olmasına baxmayaraq, təşkilat hələlik yalnız beş ildən artıq ödəməyənləri xaric etmək qərarına gəlib”.
5 il üzvlük haqqı ödəməyənlərin AYB-dən çıxarılması müzakirələrə səbəb olub.
Yeni Yazarlar və Sənətçilər İctimai Birliyinin sədri, www.kitabxana.net – Mir Cəlal Paşayev adına Milli Virtual-Elektron Kitabxananin təsisçisi, Prezident təqaüdçüsü, yazıçı-kulturoloq Aydın Xan Əbilov baki-xeber.com-a bildirdi ki, Azərbaycan Yazıçılar Birliyi milli dəyərlərdən birinə çevrilən ictimai qurumdur: “Qurumun 3 minə yaxın üzvünün üzvlük haqqı verməməsi illərdir müzakirə olunur və müxtəlif təkliflər səslənir. Məlumat üçün deyim ki, üzvlük haqqı AYB üzvlərinə bir çox imtiyaz verir. Təəssüflər olsun ki, Birliyə üzv olmağa can atanlar bir ildən sonra üzvlük haqqı olan 15 manatı ödəməkdən imtina edir. Nəzərə almaq lazımdır ki, AYB ictimai təşkilatdır, dövlətdən maliyyə yardımı alır. Ancaq buna baxmayaraq üzvlər mütləq şəkildə üzvlük haqqı ödəməlidir”.
A.X.Əbilovun dediyinə görə, elektron kitab, virtual oxu mədəniyyətinin genişləndiyi dövrdə yazı mətni arxa plana keçir: “Onu da deyim ki, Birliyə üzvlük haqqı ödəməyənlərlə bağlı uzun müddətdir müəyyən fikirlər, təkliflər səslənir. Həmin şəxslərin AYB-dən uzaqlaşdırılması müzakirə olunur. Onlara sonuncu dəfə xəbərdarlıq edilib ki, fevral ayına qədər üzvlük haqqını ödəməsələr həmin şəxslər təşkilatdan uzaqlaşdırılacaq. Bütün dünya ölkələrində belə bir qayda var ki, ictimai təşkilata üzv olanlar, mütləq üzvlük haqqı ödəməlidir. AYB yığın həmin pulla təşkilatın müəyyən işlərini görür. Belə ki, həssas təbəqədən olan yazıçılara yardım edir, bir çox kitabların nəşr olunmasına və digər işlərə sərf olunur. Bununla bağlı AYB-nin illik hesabatları olur”.
Yazıçı Sadiq Qarayev də baki-xeber.com-a şərhində bildirdi ki, hər hansı bir qurumun nizamnaməsini qəbul edən şəxs bilir ki, üzvlük haqqı ödəməlidir: “15 manatı ödəmək üzvlər üçün çətin deyil. Üzvlərin 15 manatı ödəməməsinin müəyyən səbəbləri var. Bir qisim yazıçılar məsuliyyətsizlikdən 15 manatı ödəmir, bəziləri incik düşdüyü üçün ödəniş etmir. Ola bilər ki, həmin şəxslərin kitab təqdimatlarında, yubileylərində, müxtəlif tədbirlərdə onlara qarşı lazımi diqqət göstərilməyib. Belə olan halda həmin şəxslər məlum məbləği ödəməkdən imtina edir”.
Həmsöhbətimiz hesab edir ki, AYB öz nizamnaməsinə uyğun olaraq üzvlərinə, istedadlı gənclərə qayğı göstərməlidir: “Söhbət təkcə maddi köməkdən deyil, mənəvi dəstəkdən gedir. Istedadlı gəncləri həvəsləndirmək, Azərbaycanın zəfərlərini və digər önəmli hadisələri bədii obraza gətirməsinə yönlədirmək lazımdır. Bu istiqamətdə müəyyən işlər görülməlidir. Dövlət AYB-yə yardımı istedadlı gənclərə dəstək olmaq, onları həvəsləndirmək üçün verir. Birlik yazıçıların yazıb, yaratdıqlarını xarici dillərə tərcümə etməlidir. Məsələn, mənim 5 irihəcmli kitabım var. “N” saylı qəhrəmanlıq” tarixi romanım qələbəmizə həsr olunub. Romanı oxuyanlar onu tarixi səlnamə adlandırır. Ancaq mənim bu romanı tərcüməyə etməyə imkanım yoxdur. Digər yoldaşlar da çox yaxşı əsərlər yazıb, onlara da dəstək olunmalıdır. Bir sözlə, müasir dövrdə AYB-nun funksionallığı artmalıdır. Üzvlər görsə ki, AYB bu cür işlər görür, onlar da sevə-sevə həmin üzvlük haqqını ödəyər. Son olaraq deyim ki, AYB nizamnaməyə uyğun olaraq həmin pulu istəməlidir, bununla yanaşı, həmin qurum öhdəlik götürdüyü işləri də icra etməlidir”.
Günel CƏLİLOVA
