Elyar İslamoğlu: “Məşhurlar, müğənnilər cəmiyyətə örnək olmalıdırlar”
Bu gün toy biznesində elə ifaçılar var ki, toylarının olmasından, bir az tanınmasından sui-istifadə edərək xoşagəlməz davranışlar sərgiləyir, hətta qanunu pozmaqdan belə çəkinmir.
Məsələn, “Space TV"də Tarix Əliyevin (Tolik) aparıcısı olduğu "Tarixin bir günü" verilişinə dəvət olunan müğənni Pünhan Piriyev efirə gecikib. O, verilişə gəldikdən sonra gecikmə səbəbini avtomobil yollarındakı sıxlıqla əlaqələndirib.
Efirdə reklam fasiləsindən sonra P.Piriyevin telekanala gələrkən qaydalara zidd hərəkətə yol verdiyi məlum olub. Bunu verilişin aparıcı canlı yayımda açıqlayıb. Tarix Əliyev müğənninin yol polisinə qarşı qaydalara zidd davranışı səbəbindən "Space TV"yə polis əməkdaşlarının gəldiyini bildirib.
Pünhan Piriyev baş verən xoşagəlməz olaya elə qonağı olduğu verilişdə aydınlıq gətirib:
"Efirə gecikirdim və yollar bağlanmışdı. Əlimlə işarə etdim ki, yolu açın keçim. Polis məni başa düşmədi, ya da bu hərəkətimi yanlış anladı. Aydınlaşacaq".
Daha sonra aparıcı Pünhan Piriyevin köməkçisinin izahat yazmaq üçün polis bölməsinə aparıldığını qeyd edib.
Qəribə iddiadır, polis yolu açmalı və müğənniyə yol verməli imiş.
P.Piriyev verilişə çatmaq üçün yol qaydalarını hansı haqla pozur? Hələ bir hədələyir də ki, polis məni başa düşmədi, yolu açmadı.
Sən kimsən ki, polis sənə yol açsın? Bu müğənnilər elə bilirlər ki, hər an qanunu poza bilərlər, kimsə onlara buna görə heç nə deməməlidir. Yaxud bunlar da əgər tıxaca düşüblərsə yol polisi dərhal bunlar üçün yol açmalıdır. Bu nə deməkdir, nə yanaşmadır?
Pünhanın səhvinə haqq qazandırmaq olarmı?
“Müğənni verilişə gecikə bilərdi, amma qaydaları pozmağa, polisi günahlandırmağa haqqı yox idi”
Filologiya üzrə fəlsəfə doktoru, ictmai fəal Elyar İslamoğlu “Bakı-Xəbər”ə bildirdi ki, əslində tanınmış şəxslər, məşhurlar, vəzifəli şəxslər və onların övladları qayda-qanunlara daha çox əməl edib nümunə olmalıdırlar. “Biz tez-tez mətbuatdan tanınmış şəxslərin, müğənnilərin yol hərəkəti qaydalarını pozmazı barədə məlumatlar oxuyuruq. Onların həmçinin bütün vətəndaşlar üçün mövcud olan qanunları, normaları pozduqlarını, tapdadıqlarını görürük. Bu müsbət hal deyil. Həm qayda-qanunu pozursan, həm də özünü haqlı sayırsan, polisi günahlandırırsan, bu isə yolverilməzdir. Bütün vətəndaşlar qanun qarşısında eynidir. Məşhurlar, müğənnilər cəmiyyətə örnək olmalıdırlar, daha çox onlar qayda-qanunlara tabe olmalıdırlar. Çünki cəmiyyət onların davranışlarını izləyir, bəzən gənclər onları özlərinə kumir götürür, onların fanatı olurlar. O müğənninin verilişə gecikdiyi üçün qayda pozuntusuna yol verdiyini düzgün hesab etmirəm. Verlişə gecikmək olar, amma qaydaları pozmaq olmaz. Çünki hər bir müğəninin, tanınmışın qaydaları pozması nəticəsində qəza yarana bilər, insanlar ziyan çəkər”.
E.İslamoğlu qeyd etdi ki, tanınmış şəxslər qanunlara tabe olmalı, yol polisi də qaydaları pozan bütün vətəndaşlara eyni gözdə baxmalıdır, tanınan şəxslərin sui-istifadəsinə yol verməməlidir. “Yol polisi öz vəzifəsini yerinə yetirib, o bütün vətəndaşların təhlükəsiz hərəkətini təmin edir, bu halda bir müğənniyə görə bütün camaat əziyyət çəkməli deyildi. Müğənni verilişə gecikə bilərdi, amma qaydaları pozmağa, polisi günahlandırmağa haqqı yox idi”-deyə E.İslamoğlu qeyd etdi.
Əli TURABOV
