Avropada yay tətilini uzatmaq meyli son illər getdikcə güclənir. Avropa Turizm Komissiyasının (ETC) dərc etdiyi “Avropa İçi Səyahətlərə Marağın Monitorinqi” adlı son hesabatın (22-ci dalğa) nəticələrinə görə, bu ilin iyun–noyabr ayları arasında avropalıların 77 faizi səyahət etməyi planlaşdırır. Xüsusilə sentyabr ayı populyar aylardan biri olaraq qalır – sorğu iştirakçılarının 22 faizi məhz bu dövr üçün səfər planlaşdırıb. Yay mövsümünün uzun sürməsi səbəbilə Aralıq dənizi bölgəsi ən çox arzu edilən istiqamət kimi önə çıxır. Bu baxımdan, günəşli havaları noyabrın sonuna qədər davam edən Türkiyənin möhtəşəm sahilləri gündəlik həyatın yorğunluğundan uzaq, sakit bir məkan təqdim edir. Günəşə qərq olmuş Egey sahilləri və parlaq Aralıq dənizi suları ilə Türkiyə, yayını bir az da uzatmaq istəyən avropalılar üçün ideal seçimdir.
Daha az izdiham, cəlbedici qiymətlər və rahat uçuş imkanları axtaranlar üçün Türkiyənin sahilləri unudulmaz istirahət vəd edir.
Türkiyə Egey sahilləri
Bitməyən yay günlərindən zövq almaq üçün ilk dayanacağınız İzmir ola bilər. Yüksək həyat keyfiyyəti və sakit Egey ab-havası ilə tanınan İzmirin hər küncündə göz oxşayan sahil qəsəbələri sizi qarşılayır. Amma ən unudulmaz istirahət Çeşmə yarımadasındadır – burada Çeşmə, Urla və Alaçatının cəlbedici üçlüyünü kəşf edə bilərsiniz. Çeşmə həm müxtəlif otelləri, həm də ləzzətli Egey yeməkləri təqdim edən restoranları ilə seçilir. Məşhur Mavi Bayraqlı İlıca çimərliyi və yerli sakinlərin sevimli gizli guşəsi olan Şifne isə bu gözəlliyə tamam başqa rəng qatır. Urla isə üzüm bağları marşrutu və “fermadan süfrəyə” konseptli restoranları ilə əsl kulinariya cənnətidir. Onların bəziləri artıq MICHELIN ulduzları ilə də mükafatlandırılıb.
Növbəti dayanacaq üçün Bodrum-Milas və ya Dalaman hava limanlarına enəndə, artıq Muğlanın valehedici sahillərinə çox yaxındasınız. Qızılı qumlar, gizli körfəzlər və özünəməxsus ruhu olan şəhərciklər sizi qarşılayır. Lüks anlayışının simvolu olan Bodrum isə ən məşhur məkan olaraq önə çıxır – beşulduzlu otelləri, qızıl sahilləri, dalğıc imkanları və Bodrum qalası kimi tarixi abidələri ilə ideal tətil məkanıdır. Muğlanın digər şəhərləri də Mavi Bayraqlı çimərlikləri ilə seçilir: Marmarisdə İçmələr, Dalyanda nəsli qorunan dəniz tısbağalarının məskəni olan İztuzu, Datçada Palamutbükü sahilləri. Fethiyədəki Ölüdəniz isə əsl incidir – dünyaca məşhur Mavi Lagunu ilə dünyanın ən gözəl çimərlikləri sırasında ilk sıralarda göstərilir. Babadağ dağından paraplan uçuşu isə burada təcrübə edilə biləcək ən həyəcanverici macəralardandır.
Muğlanın istənilən guşəsində – bu cənnət küncdə – sahil restoranlarında günün ən təzə balıqları, orijinal türk məzələri və dünya mətbəxinin dadlı nümunələri ilə tətiliniz tamamlanacaq. Bəziləri hətta MICHELIN siyahısına da daxil edilib.
Antalyada bitib-tükənməyən yay
Türkiyə Rivierasının incisi sayılan Antalya, gözoxşayan təbiəti, qədim Likiya, Pamfiliya və Pisidiya bölgələrinin zəngin tarixi və ilboyu günəşli havası ilə hər bir səyahətçi üçün əsl cənnətdir. İldə 300 gün günəşli hava ilə öyünən Antalya, dünyada ən çox Mavi Bayraq mükafatı alan şəhərdir – tam 233 çimərliklə.
Patara çimərliyinin geniş qumlarından tutmuş, şəhər mərkəzindəki Konyaaltı və Lara sahillərinə, bohem ruhunu qoruyan Olymposa qədər Antalya sahilləri saysız-hesabsız ziyarət olunmalı məkanları ilə turistləri heyran edir. Amma bura məxsus, əsl Aralıq dənizi simvoluna çevrilmiş bir çimərlik var: Kaputaş.
Dərin kanyonun ağzında yerləşən bu çimərlik dünyanın ən gözəl çimərlikləri siyahısında daim yer alır. Sakitlik axtaranlar üçün isə Sazak körfəzi və Porto Ceneviz kimi gizli guşələr mükəmməl seçimdir.
Antalyada yay mövsümünün uzun çəkməsi qədim şəhərləri kəşf etmək üçün də əla fürsət yaradır. Pergedən Aspendosa qədər hər daş, hər qalıq minillik sivilizasiyaların hekayəsini pıçıldayır və sizi insanlığın tarixinin mərkəzinə aparır. Bu zəngin təcrübəni tamamlayan isə Aralıq dənizi mətbəxinin incəlikləridir – ən təzə dəniz məhsulları və yerli üzümlərdən hazırlanan yüngül ağ şərablar ilə Riviera təcrübəniz əsl zirvəsinə çatır.
SAMİRƏ
