Turizmin əsas dayaqları, sözsüz ki, tarixi-mədəni abidələr və əlverişli təbii resurslardır... Məhz bu səbəbdən qardaş Türkiyədə turizm sürətlə inkişaf edir. Son illər dünyanın istənilən nöqtəsindən turistlər Türkiyəyə üz tutur. Əgər 2015-ci ildə Ümumdünya Turizm Təşkilatının siyahısında Türkiyə turist sayına görə ilk 50 ölkə arasında idisə, bu gün artıq dünyanın ilk beşliyi sırasına yüksəlib. Bu uğurda müasir turizm obyektləri, xidmət sahəsi, qonaqpərvər insanlar və əlbəttə, ölkənin zəngin təbiəti mühüm rol oynayır. Türkiyənin hər bölgəsi turizm üçün əlverişli olsa da, bu yazımızda “Türkiyənin cənnəti” adlandırılan Tekirdağ haqqında danışacağıq. İstanbuldan cəmi 140 km məsafədə yerləşən Tekirdağ zəngin tarixi və təbiəti ilə turistləri valeh edir. Mərmərə dənizi sahilində yerləşən bu qədim Trakya şəhəri dağ və dəniz mənzərələri ilə xüsusi gözəlliyə sahibdir. Sahilboyu çimərliklər, parklar, çay bağları və yaşıl məkanlarla zəngin Tekirdağ həm də XVIII əsrə aid taxta evləri ilə diqqət çəkir. Tekirdağ Arxeologiya və Etnoqrafiya Muzeyi – Osmanlı memarlığını əks etdirən keçmiş qubernator köşkündə yerləşir. Muzeydə 25 mindən çox arxeoloji və etnoqrafik əsər sərgilənir. Burada eramızdan əvvəl IV əsrə aid nümunələr, Bizans və Osmanlı dövrünə məxsus əşyalar, geyimlər və əl işləri nümayiş olunur. Rakoçzi Muzeyi – Türk-Macar dostluğunu simvolizə edən bu muzeydə 1700-cü illərdə Tekirdağda yaşamış Macarıstan şahzadəsi II Ferenc Rakoçzinin şəxsi əşyaları, sənədləri, məktubları və portretləri qorunur. Rüstəm Paşa Məscidi – Memar Sinanın şah əsərlərindən biri olan məscid XVI əsrdə inşa edilib. Bir vaxtlar mədrəsə və digər tikililərlə birlikdə böyük kompleks təşkil edirdi. Süleymaniyyə Məscidi (Çorlu) – XIV əsrdə Qanuni Sultan Süleymanın əmri ilə tikilmiş bu məscid Osmanlı memarlığının incəliklərini özündə əks etdirir. Namık Kamal Evi – Məşhur şair, publisist və islahatçı Namık Kamalın xatirəsinə həsr olunmuş muzeydə Tekirdağın tarixinə aid fotoşəkillər və eksponatlar sərgilənir. Hora Mayak (Şarköy) – 1860-cı ildə fransız mühəndislər tərəfindən inşa edilmiş mayak bu gün də Mərmərə dənizində gəmilərə yol göstərir. Çorlu Qalası – Bizans dövrünə aid qala sonralar Osmanlılar tərəfindən də istifadə edilib. Ulaş Körpüsü və Kırkgöz Körpüsü – Osmanlı və Roma dövrlərindən qalan tarixi körpülərdir. Thzolus Antik Şəhəri – Tarixi eramızdan əvvəl 1000-ci ilə gedib çıxan bu qədim şəhər Roma, Bizans və Osmanlı hakimiyyətlərini görüb. Tarixi Çorlu Evi – İki əsrlik tarixi olan taxta ev bu gün muzey kimi fəaliyyət göstərir. Melen Monastırı – VI əsrə aid bu qədim dini mərkəz vaxtilə şərab istehsalı ilə məşhur olub. St. John Theologos Monastırı (Şarköy) – XIX əsrdə inşa edilmiş bu monastır müəyyən günlərdə dini ayinlərə ev sahibliyi edir. Tekirdağ həm qədim tarixi, həm də gözəl təbiəti ilə Türkiyənin ən cazibədar bölgələrindən biridir. Bu şəhərə səyahət etsəniz, qədim sivilizasiyaların izləri ilə tanış olacaq, Osmanlı memarlığının gözəlliyini görəcək və unudulmaz bir tarixi-mədəni yolçuluq edəcəksiniz.
SAMİRƏ
