Son illərdə mütəmadi olaraq qeyri-neft məhsulları ixracının stimullaşdırılması məqsədilə “Made in Azerbaijan” brendinin təbliği ilə bağlı dəstək tədbirləri həyata keçirilir, dövlət vəsaiti hesabına sahibkarlar ixrac missiyalarında, beynəlxalq sərgilərdə iştirak edirlər.
İxracın stimullaşdırılması tədbirləri çərçivəsində prosedurlar sadələşdirilir, yerli məhsullarımızın ixrac potensialı yüksək olan ölkələrdə ticarət nümayəndələri fəaliyyət göstərir, ticarət və şərab evlərinin yaradılması ilə bağlı işlər davam etdirilir. İndiyədək Azərbaycanın xarici ölkələrdə 10-dan çox ticarət və şərab evi açılıb.
Azərbaycanla əməkdaşlıq etmək istəyən ölkələrin sayı artmaqda davam edir. Bu günlərdə ölkəmizdə səfərdə olan Türkmənistan Prezidenti Qurbanqulu Berdiməhəmmədov Azərbaycan Prezidenti İlham Əliyevlə birgə mətbuata bəyanatlarla çıxış edərkən deyib ki, Bakıda Türkmənistan ticarət evinin və Aşqabadda Azərbaycan ticarət evinin təsis edilməsi barədə razılıq əldə olunub:”Bu, əlbəttə, əmtəə dövriyyəsinin artırılması üçün bizə daha yaxşı imkanlar yaradacaq. Türkmənistanın və Azərbaycanın hələ istifadə edilməmiş potensialı var”.
“Ticarət evlərinin açılması prakitiki olaraq Azərbaycan məhsullarının daha geniş coğrafiyaya ixrac edilməsi və sözügedən ölkələrlə xarici ticarət əlaqələrinin genişləndirilməsinə xidmət edir”
Millət vəkili, iqtisadçı alim Vüqar Bayramov bildirdi ki, xaricdə Azərbaycan Ticarət evlərinin açılması “Made in Azerbaijan” brendinin tanıdılması, ölkəmizdə istehsal olunan məhsulların xarici bazarlara çıxışının təmin edilməsi baxımından əhəmiyyətli addımdır: “Artıq Çində Azərbaycan Ticarət Evi fəaliyyət göstərir. Eyni zamanda, MDB məkanında artıq belə ticarət evləri var. Ticarət evlərinin açılması prakitiki olaraq Azərbaycan məhsullarının daha geniş coğrafiyaya ixrac edilməsi və sözügedən ölkələrlə xarici ticarət əlaqələrinin genişləndirilməsinə xidmət edir. Bu, ondan xəbər verir ki, Azərbaycan xüsusən də qeyri-neft məhsullarının fərqli məkanlara ixrac edilməsində maraqlıdır. Sözsüz ki, bu kontekstdən bizim üçün yeni bazarlar əhəmiyyətlidir.”
V.Bayramov onu da əlavə etdi ki, Azərbaycan ənənəvi bazarlarla yanaşı, yeni bazarlara çıxış imkanları əldə etməyə çalışır: “Bununla bağlı ölkə Prezidenti cənab İlham Əliyev tərəfindən xüsusi göstərişlər var. Ticarət evlərinin yaradılması da Azərbaycanın qeyri-neft məhsullarının yeni bazarlara ixrac edilməsi məqsədi daşıyır. Bundan əlavə, Ticarət evləri həmin ölkələrdə Azərbaycan məhsullarının tanıdılması, birgə layihələrin həyata keçirilməsi və sərmayə qoyuluşlarının reallaşdırılmasına xidmət edəcək. Bu baxımdan Ticarət evləri hətta ölkədən kənarda - xaricdə yaradılsa da belə, məqsəd Azərbaycanın qeyri-neft sektorunda istehsal etdiyi məhsulların həmin ölkələrə ixracının təmin edilməsi, bu sektora sərmayələrin cəlb edilməsi olduğu üçün təbii ki, bu da iqtisadiyyatın diversifikasiyasına müsbət təsir göstərir.”
Günel CƏLİLOVA
