Sığorta bazarında sərt qaydalar dövrü başlandı

Tarix: 24.10.2014 / 03:59
Bölmə: İqtisadiyyat

Cari il ərzində sığorta sferasında yaşanan proseslər xüsusi diqqət cəlb etməkdədir. Çünki proseslər bazarın bu sahəsində də qaydaların kifayət qədər sərtləşdirilməkdə olduğunu göstərir. Həmçinin, sığorta ödənişlərinin artması bazarda ancaq güclü oyunçuların qala biləcəyini göstərir. Qeyd edək ki, əvvəlki dövrlərlə müqayisədə, sığorta şirkətlərinin ödənişləri getdikcə artır.
Bu ilin yanvar-sentyabr aylarının yekunlarına görə, ölkədə ən zərərli sığorta növü avtomobillərin könüllü sığortasıdır. Sığorta şirkətləri bu sahədən topladıqları hər 100 manatın 74 manatını, yəni 74%-ni müştərilərinə geri qaytarıb. Ötən il isə bu nisbət 46% olub. Zərərliliyin artması bu ilin əvvəlindən ölkədə avtomobil satışının və kasko sığortasından daxilolmaların azalması ilə bağlıdır. Zərərliliyin səviyyəsinə görə sonrakı yerdə tibbi sığorta qərarlaşıb. Bu sığorta növü üzrə toplanan hər 100 manat sığorta haqqının 66 manatı ödəniş edilib. Şirkətlər avtonəqliyyat vasitəsi sahiblərinin mülki məsuliyyətinin könüllü sığortasına görə də çox ödəniş ediblər. Hesabat dövrünə, bu sığorta növündən əldə olunan hər 100 manatın 61 manatı ödənişə gedib. Ötən il isə bu nisbət 19% olub. Avtomobillərin icbari sığortasında da ödəniş səviyyəsi artıb. İlk 9 ayın nəticəsinə görə, bu sığorta növü üzrə toplanan hər 100 manatın 41 manatı ödəniş edilib, ötən il isə bu rəqəm 38 manat idi.
Hazırda sığorta şirkətləri, əvvəlki illərdə olduğu kimi, topladığı sığorta haqlarını artıra bilmir. Hətta iri sığorta şirkətlərinin də yığımları azalıb. Orta və kiçik sığorta şirkətlərinin çoxunun vəziyyəti isə daha pisdir. Azərbaycan Sığortaçılar Assosiasiyasının sədri Orxan Bayramov bildirib ki, baş verənlərə rəğmən, sığorta bazarı durğunluğa girməyib: "Bazarın ümumi göstəricisinə baxılarsa, onun durğunluğa girdiyini demək doğru olmaz. Çünki bazarın bəzi sahələrində ciddi artım, bəzi sahələrində isə kəskin azalma var, bu da durğunluq sayılmır. Yığımların bəzi növlərdə artması, bəzi növlərdə isə azalması bir-birini tənzimlədiyi üçün bazarın artımı 3,5% olub. Sığorta bazarında keyfiyyət dəyişikliyi gedir. Hazırda avtomobil sığortası üzrə yığımlar azalır, ödənişlər isə kəskin artır. Belə vəziyyət sığorta şirkətlərini yeni məhsullar istehsal etməyə məcbur edir. Bu da gələcəkdə bazarın canlanmasına gətirib çıxaracaq, bir mərhələdən sonra geriyə proseslər başlayacaq və yığımlar artacaq. Bu prosesin başlaması üçün sığorta ödənişlərinin verilməsi prosedurları sadələşməli, məhsul çeşidliliyi təmin olunmalı və əhalinin sığorta barədə bilikləri daha da artırılmalıdır".
Yuxarıda qeyd olunduğu kimi, sığorta bazarında qaydalar da sərtləşdirilir. Eyni zamanda, əvvəllər sığorta şirkətlərinin gətirdiyi bəhanələrin yığışdırılması üçün real addımlar atılır. Məsələn, məlumdur ki, avtomobillərin könüllü sığortalanması ilə bağlı mühüm yeniliklərə start verilib. "Fiziki şəxslərə təqdim edilən avtomobil nəqliyyatı vasitələrinin tam sığortası üzrə sığorta Qaydaları"nda avtomobillərin könüllü sığortası ilə bağlı maraqlı yeniliklər nəzərdə tutulur. Bu dəyişikliklər, "fins" portalının məlumatına görə, müştərilərlə sığorta şirkətləri arasında mübahisələri azaltmalı, sığorta ödənişlərinin verilməsi prosesini sürətləndirməli və bu sahədəki əngəlləri aradan qaldırmalıdır.
Qaydalardakı maraqlı yeniliklərdən biri odur ki, bundan sonra sığorta şirkətləri avtomobili taksi kimi istifadə edən sürücülərə sığorta ödənişi verməkdən imtina edə bilməyəcək. Söhbət sığortalanan avtomobillərin sonradan başqa məqsədlərlə, məsələn, taksi kimi istifadəsindən gedir. Hazırda qüvvədə olan qaydalara görə, avtomobil sığortalananda onun sahibi maşının hansı məqsədlə istifadə olunacağını sığorta ərizəsində göstərməlidir. Qəza baş verən zaman aşkar edilsə ki, avtomobil ərizədə göstərilən məqsədlə istifadə edilməyib, sığorta şirkəti ödənişdən imtina edə bilər. Başqa sözlə, avtomobil sığortalananda ərizədə onun taksi kimi istifadə olunacağı göstərilməyibsə, sonradan taksi məqsədilə istifadə edildiyi aşkar olunduqda ona sığorta ödənişi verilmirdi.
Yeni qaydalarda isə bu tələb götürülüb. İndi ödənişdən yalnız o zaman imtina edilə bilər ki, avtomobil təyinatı üzrə istifadə edilməsin. Minik avtomobilində sərnişinin daşınması isə həmişə təyinat üzrə olduğundan, artıq maşının taksi kimi istifadə olunması ödənişdən imtina üçün əsas sayılmayacaq. Qeyd edək ki, avtomobillərin taksi məqsədilə istifadə olunması sığorta şirkətləri ilə müştərilər arasında ən çox mübahisəyə səbəb olan amillərdən biridir. Yeni qaydaların qəbulu ilə Azərbaycanda sığorta şirkətləri ilə avtomobil sahibi arasında avtomobilin təmiri ilə bağlı mübahisələrə də son qoyulacaq. Belə ki, avtomobil əzildiyi halda, onun harada təmir ediləcəyi hələ müqavilə bağlananda müəyyən ediləcək. Bank kreditlərinin sığortalanması ilə də bağlı yeniliklər xüsusi diqqət cəlb edir. Artıq bankdan kredit götürənlərə sığorta lazım olarsa, onlar bankın təklif etdiyi sığorta şirkətini deyil, istədikləri sığortaçını seçə biləcək.
Bunun üçün həm qanunvericiliyə dəyişiklik olunacaq, həm də ayrıca metodoloji sənədlər hazırlanaraq ilin sonuna qədər banklara göndəriləcək.
Bütün bunlar isə banklar və sığorta şirkətləri arasında rəqabətin artmasına təkan verəcək.
Bu vəziyyətdə ilk olaraq zəif sığorta şirkətlərinin bazardan çıxması gözlənir. Ekspertlərin fikrincə, elə şirkət var ki, yaranmış vəziyyətdə ilin sonuna kimi fəaliyyətini dayandırmalı olacaq.

DİGƏR XƏBƏRLƏR

Tarix: 31.10.2026 / 11:23

Qubadlıda ilk su elektrik stansiyası tikilir...

Tarix: 30.10.2026 / 18:36

Azərbaycan illərdi Transxəzər qaz kəmərindən danışır - Aşqabad indi hərəkətə keçir...

Tarix: 30.10.2026 / 17:04

Azərbaycanda əhali dollarını satır

Tarix: 30.10.2026 / 12:14

Azərbaycanla Gürcüstan arasında yeni sərhəd-keçid məntəqəsi yaradılır...

Tarix: 29.10.2026 / 13:45

"Sahibkar olmayan şəxsin kartına hər gün 5 dəfə pul daxil olması normal deyil" - Mərkəzi Bankın sədri

Tarix: 29.10.2026 / 13:07

“Bank Melli İran” Azərbaycandan gedir? - Mərkəzi Bankdan açıqlama...

Tarix: 29.10.2026 / 11:49

Azərbaycanın strateji valyuta ehtiyatları 89,4 milyard dollara çatdı...

Tarix: 29.10.2026 / 10:43

Mərkəzi Bank illik inflyasiya ilə bağlı proqnozunu açıqladı...

Tarix: 29.10.2026 / 10:04

Mərkəzi Bank uçot dərəcəsini sabit saxladı...

Tarix: 28.10.2026 / 18:30

Tramp "Şimal axını" qaz kəmərini Rusiyadan satın ala bilər...

Tarix: 28.10.2026 / 18:22

İpoteka kreditlərinin verilməsi qaydalarına dəyişiklik edildi

Tarix: 28.10.2026 / 16:15

Ətin qiymətinə görə Ermənistandan da geridəyik - hesabatı kim yayıb?

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Turizm regionlarımızın inkişaf mənbələrindən birinə çevrilir...