Məlum olduğu kimi, Azərbaycanda qaz limiti artırılıb. Dövlət başçısının tapşırığına əsasən, əhali üzrə təbii qazın aşağı tariflə illik istehlak həcmi 1700 kubmetrdən 2200 kubmetrədək artırılıb.
Yeni qərara əsasən, dünəndən 1,8 milyondan artıq abonent (7 milyondan çox vətəndaş) qaz istehlakından aşağı tariflə yararlanmaq imkanı əldə edib. Məlumat üçün qeyd edək ki, bir abonentin faktiki orta illik təbii qaz istehlakı 1400 kubmetrdən aşağıdır.
Qazın limitinin 1700 kubmetrdən 2200 kubmetrə qaldırılmasını, kimliyindən asılı olmayaraq, hər kəs müsbət qarşılayır.
Vahid Əhmədov: “Qazın limitinin 1700 kubmetr həddində olması bəzən vətəndaşlar, xüsusilə nisbətən imkansız təbəqədən olanlar və həyət evlərində yaşayanlar üçün çətinlik yaradırdı”
Millət vəkili Vahid Əhmədov qeyd etdi ki, qazın limitinin qaldırılması müsbət və əhəmiyyətli addımdır: “Bu, son aylar daha da geniş vüsət alan islahatlar siyasətinin tərkib hissəsidir. Qazın limitinin 1700 kubmetr həddində olması bəzən vətəndaşlar, xüsusilə nisbətən imkansız təbəqədən olanlar və həyət evlərində yaşayanlar üçün çətinlik yaradırdı. Məlumdur ki, limit 1700-lük həddi keçəndən sonra qiymət, tarif dəyişirdi və bu da insanların güzəranına, yaşayışına, maddi durumuna ciddi təsir edirdi.
İnsanlar bundan əziyyət çəkirdilər. Bu məsələ ilə bağlı tez-tez vətəndaşlar tərəfindən bizə, millət vəkillərinə də müraciət olunurdu. Qazın limitinin qaldırılması yaxşı haldır. Sevindirici haldır ki, bizim səsimiz eşidildi, hər kəsi narahat edən məsələyə əl qoyuldu”.
Aydın Mirzəzadə: “Sosial problemlərin həlli Azərbaycan iqtidarının fəaliyyətinin əsasını təşkil edir”
Millət vəkili Aydın Mirzəzadə bildirdi ki, qazın limitinin artırılması ilə bağlı dövlət başçısının qərarı bir daha göstərdi ki, dövlət daim vətəndaşın yanındadır: “Məlumdur ki, insanlar kommunal ödənişi etməkdə çətinlik çəkirdilər. Bu problem vaxtaşırı həm mediada, həm də parlamentdə müzakirə olunurdu. Sevindirici haldır ki, qazın limiti 1700-dən 2200 kubmetrə qaldırıldı. Bu hal bir daha göstərdi ki, qaldırılan hər hansı bir məsələ diqqətdən kənarda qalmır”.
Millət vəkili onu da vurğuladı ki, əhalinin sosial vəziyyətinin yaxşılaşması ilə bağlı qazın limitinin qaldırılması sonuncu qərar deyil. Bu kimi qərarların sayı çox olacaq: “Nazirlərin Prezident qarşısında qaldırdığı məsələlər bir daha göstərir ki, sosial problemlərin həlli Azərbaycan iqtidarının fəaliyyətinin əsasını təşkil edir”.
Günel CƏLİLOVA
