Vahid Məhərrəmov: "Belarusda Azərbaycan xalçalarının istehsal olunması ölkəmizin tanıdılmasında müsbət rol oynayacaq"
Belarus prezidenti Aleksandr Lukaşenko ölkəmizdə rəsmi səfərdə olarkən qarşılıqlı ticarət əlaqələrinin inkişaf etdirilməsi ilə maraqlanıb.
Həmçinin, o, Azərbaycan xalçalarının ölkəsində istehsal edilməsi təklifi ilə də çıxış edib: "Azərbaycan xalçaları gözəl, yüksək keyfiyyətli xalçalardır. Mən şəxsi təcrübəmdən bunu bilirəm. Prezidentə də dedim ki, nə üçün Belarusda xalça istehsal edilməsin? Prezident dedi ki, biz yun satmağa da hazırıq, Belarusda yun yoxdur. Biz iqlim şəraitinə görə Belarusda bu cür yun istehsal edə bilmirik. Bütün dünyadan yun aldığımız halda Azərbaycandan nə üçün almayaq? Gəlin bu istehsalatı birlikdə yaradaq və siz Belarus bazarı ilə yanaşı, bu cür keyfiyyətli xalça məmulatı istehsal etməyən qonşu dövlətlərin bazarına da çıxış əldə edəcəksiniz".
Azərbaycan xalçalarının Belarusda istehsal olunması Azərbaycan brendinin xarici ölkələrdə tanıdılması olacaq.
Xalçaçı rəssam Aydın Rəcəbov "Bakı-Xəbər"ə açıqlamasında qeyd etdi ki, Azərbaycan xalçalarının qonşu ölkələrdə istehsal olunması təqdirəlayiqdir: "Ölkəmizə gələn qonaqlar xalçalarımıza aşiq olur, eynilə Aleksandr Lukaşenko kimi.
Amma Belarusda Azərbaycan xalçalarının necə və hansı şəraitdə istehsal olunacağı maraqlıdır. Bəllidir ki, hər bir xalqın öz ruhu və mədəniyyəti var. Azərbaycanlı qızlar bayatı deyərək xalça toxuyur. Onlar bu işə ürəklə yanaşır".
Həmsöhbətimizin sözlərinə görə, Belarusda Azərbaycan xalçaları istehsal olunarkən yəqin ki, Azərbaycanın xalçaçı ustalara ehtiyacı olacaq: "Bu işin sirrini öyrənmək üçün bir müddət belaruslu xanımlar bizim qadınlardan dərs öyrənməli olacaq. Yox, onların özü bu işə birbaşa başlasa, o zaman onlar xalça məktəblərini qarışdıra bilər. Yəni hər bir bölgənin özünəməxsus naxışı və elementi var".
Xalçaçı rəssam onu da diqqətə çatdırdı ki, Azərbaycan xalçası ölkəmizin rəmzidir: "Qonşu ölkələrdə, o cümlədən, Belarusda Azərbaycan xalçalarının istehsal olunması həm mədəniyyətimizə, həm də iqtisadiyyatımıza müsbət təsir edəcək. Azərbaycan xalçaları "Made in Azərbaycan" adı altında həm qonşu ölkələrdə istehsal olunar, həm də satışı təşkil olunar".
Aqrar sahə üzrə ekspert Vahid Məhərrəmov qəzetimizə açıqlamasında qeyd etdi ki, Azərbaycan xalçalarının sədasının əcnəbi ölkələrdən gəlməsi sevindirici olar: "Belarus çox gözəl xalçalar istehsal edir. Onu da nəzərə almaq lazımdır ki, Lukaşenko bu sahədə çox təcrübəlidir. Belarus həm MDB ölkələrinin məhsulla təminatında, həm kənd təsərrüfatı, həm də texniki məhsulların təminatında aparıcı ölkəyə çevrilib. MDB məkanında ən rəqabət qabiliyyətli ölkə, demək olar ki, Belarusdur".
Həmsöhbətimizin sözlərinə görə, Belarusda Azərbaycan xalçalarının istehsal olunması ölkəmizin tanıdılmasında müsbət rol oynayacaq.
Günel CƏLİLOVA
