Natiq Cəfərli: “Hesablama Palatası vacib dövlət qurumudur, onun rəyi istintaq araşdırmalarının aparılmasına əsas yaradır, bu səbəbdən də…”
Hesablama Palatası (HP) İpoteka vә Kredit Zәmanәt Fondunda (İKZF) güzəştli ipoteka kreditlərinin verilməsində bəzi nöqsanlar aşkarlayıb. Belə ki, güzәştli ipoteka kreditlәrinin verilmәsindәn geri qaytarılan vәsait tam olaraq tәkrar maliyyәlәşdirmәyә yönәldilmәyib, bir hissәsi ipoteka örtüyü ilә tәmin edilmiş ipoteka istiqrazlarının bağlanmasına vә digәr istiqamәtlәrә yönәldilib.
Palata qeyd edib ki, dövlәt büdcәsindәn Mәnzil İnşaatı Dövlәt Agentliyinin (MİDA) sәrәncamında olan mәnzillәrin güzәştli ipoteka kreditlәri vasitәsilә satışını dәstәklәmәk üçün ayrılmış vәsait tam istifadә edilmәyib.
İpoteka vә Kredit Zәmanәt Fondunda (İKZF) güzəştli ipoteka kreditlərinin verilməsində aşkarlanan nöqsanlar böyük maliyyə pozuntusu sayıla bilər və burada dövlətə hansı səviyyədə ziyan vurulub?
“Hesablama Palatasının məlum açıqlaması həmin sahədə çoxlu sayda problemlərin olduğunu göstərir və geniş, detallı araşdırmanın aparılmasını tələb edir”
Iqtisadçı Natiq Cəfərli “Bakı-Xəbər”ə şərhində bildirdi ki, Hesablama Palatası İpoteka vә Kredit Zәmanәt Fondunda güzəştli ipoteka kreditlərinin verilmə üsullarında nöqsanların olduğunu qeyd edib. Ancaq bunun rəqəmsal olaraq hansı formada həyata keçirildiyini, nə qədər ziyan dəydiyini və bir sıra sahələr üzrə detalları açıqlamayıb: “İstənilən halda Hesablama Palatasının məlum açıqlaması həmin sahədə çoxlu sayda problemlərin olduğunu göstərir və geniş, detallı araşdırmanın aparılmasını tələb edir. Nəzərə almaq lazımdır ki, Hesablama Palatası vacib dövlət qurumudur və onun rəyi istintaq araşdırmalarının aparılmasına əsas yaradır. Güzəştli şərtlərlə ipoteka əhalinin böyük bir hissəsini maraqlandırır. Nəzərə almaq lazımdır ki, mənzil sahibi olmaq Azərbaycanda böyük bir problemə çevrilib, bunun da səbəbi qiymətlərin fantastik dərəcədə artmasıdır. Bu səbəbdən ailələr güzəştli şərtlərlə ipoteka almaq istəyir, cəhd göstərir. Qeyd edilən sahədə aşkar olunan fakt ciddi şəkildə araşdırılmalı və problem aradan qalxmalıdır. Ən vacib məsələ isə odur ki, bu nöqsanlara yol vermis vəzifəli şəxslər cəzalandırılmalıdır”.
Günel CƏLİLOVA
