Prezident İlham Əliyev aqroparkların fəaliyyətinin təşkili, idarə olunması və inkişafı sahəsində əlavə tədbirlər və bununla əlaqədar bəzi fərmanlarında və sərəncamında dəyişiklik edilməsi haqqında fərman imzalayıb.
Fərmana əsasən, dövlət tərəfindən aqroparkların yaradılması və aqroparkların fəaliyyətinin tənzimlənməsi ilə bağlı tədbirləri həyata keçirmək səlahiyyəti İqtisadiyyat Nazirliyindən alınaraq Kənd Təsərrüfatı Nazirliyinə verilib.
Aqroparkların Kənd Təsərrüfatı Nazirliyinin nəzarətinə verilməsi aqrar sektorun inkişafına necə təsir edə bilər?
Aydın Hüseynov: “Bu qərar ölkənin ərzaq təhlükəsizliyinin təmin edilməsinə səbəb olacaq”
Millət vəkili Aydın Hüseynov “Bakı-Xəbər”ə şərhində bildirdi ki, aqroparkların fəaliyyətinin tənzimlənməsinin Kənd Təsərrüfat Nazirliyinə həvalə edilməsi aqrar sahənin inkişafı istiqamətində görülən müsbət işlərdən biridir: “Məlumdur ki, Kənd Təsərrüfatı Nazirliyi ölkədə aqrar siyasətin həyata keçməsini müəyyənləşdirir. Bu sahədə də kifayət qədər təcrübəyə malikdir”.
Millət vəkili hesab edir ki, aqroparkların Kənd Təsərrüfatı Nazirliyinin nəzarətinə verilməsi ölkənin ərzaq təhlükəsizliyinin təmin edilməsinə səbəb olacaq və bu da müsbət nəticələrə gətirib çıxaracaq: “Həmçinin, maliyyə vəsaitlərinin effektli idarə olunması aqroparkların inkişafında ciddi dönüşə səbəb olacaq. Ümumiyyətlə, bu qərar doğru qərardır, ona görə ki, aqrar sahə ilə Kənd Təsərrüfatı Nazirliyinin bir mərkəzdən idarə olunması effektivliyin artırılmasına səbəb ola bilər”.
Xalid Kərimli: “Aqroparkların Kənd Təsərrüfatı Nazirliyinin nəzarətinə verilməsi istehsalın və ixracların artmasına müsbət təsir edəcək”
İqtisadçı Xalid Kərimlinin sözlərinə görə, bu, əvvəllər İqtisadiyyat Nazirliyində ayrıca bir qurum idi: “İndi onun fəaliyyəti inzibati struktur kimi Kənd Təsərrüfatı Nazirliyinə həvalə edilib. Aqroparkların əhəmiyyətli hissəsi böyük holdinqlərin və qrupların maliyyələşməsi ilə yaranıb. Amma istənilən halda bazarın formalaşmasında rol oynayırlar. Aqroparkların Kənd Təsərrüfatı Nazirliyinin nəzarətinə verilməsi istehsalın və ixracların artmasına müsbət təsir edəcək".
Günel CƏLİLOVA
