Xalid Kərimli: "Hələ ki, qızıla edilən yatırımlar özünü doğruldur"
Azərbaycan xaricdən qızıl idxalını kəskin şəkildə artırıb. Dövlət Statistika Komitəsinin məlumatına əsasən, 2024-cü ilin yanvar-noyabr ayları ərzində Azərbaycan xaricdən 2,7 milyard dollar dəyərində 34083 kiloqram qızıl alıb.
Qızıl idxalı 2023-cü ilin eyni dövrü ilə müqayisədə miqdar ifadəsində 423 dəfə, məbləğ ifadəsində isə 796 dəfə artıb. Qeyd edək ki, Azərbaycan 10 ölkədən - Qazaxıstan, Rusiya, Amerika Birləşmiş Ştatları, Avstraliya, Birləşmiş Ərəb Əmirlikləri, Böyük Britaniya, İsveçrə, Kanada, Türkiyə və Almaniyadan qızıl alıb. Məsələn, Azərbaycan Rusiyadan 1985 kiloqram, Qazaxıstandan 1919 kiloqram, Türkiyədən 70 kiloqram qızıl idxal edib. Ölkəmiz ən çox qızılı Avstraliyadan, ən az miqdarda isə Almaniyadan alıb. Onu da bildirək ki, Azərbaycan qızıl alışına görə dünyada ilk beşlikdə yer alıb.
"Qızıl idxalının artmasına səbəb isə qeyri-müəyyənliklərin artmasıdır"
Azərbaycanın qızıl alışını artırması barədə fikir bildirən iqtisadçı ekspert Xalid Kərimli "Bakı-Xəbər"ə şərhində bunları bildirdi: "Azərbaycan qızıl alışını kəskin şəkildə artırıb. 2023-cu ilin sonunda Neft Fondu 101,8 ton qızıl ehtiyatı ilə bütün resurslarını 12 faizini qızıla yerləşdirmişdi. 2024-cu ilin sonunda bu rəqəm oldu 146,6 ton, ümumi resurs isə 20,6 faiz olub. İl ərzində bütün portfelini qızıla keçirib, əlavə 44,8 ton qızıl alıb. Bu, əsas diqqəti cəlb edən məqamdır. Qızıl idxalının artmasına səbəb isə qeyri-müəyyənliklərin artmasıdır. Onu da deyim ki, tək Azərbaycan yox, Rusiya, Türkiyə, Braziliya, Çin kimi ölkələrin Mərkəzi Bankı ehtiyatlarını daha çox qızıl ehtiyatının artırılmasına yönəldib. Bu səbəbdən qızıl son illər bahalaşır. Qızılın bahalaşmasına səbəb isə sanksiyaların davam etməsidir. Onu da deyim ki, cari ilin sonuna kimi qızılın qiymətinin artması gözlənilir. Neft Fondunun mütəxəssisləri hesab edir ki, həm qızılın qiymətinin artması proqnozlaşdırılır, həm də risqlərin səviyyəsi artır. Bu səbəbdən də qızıla yatırım edilib. Hələlik, bu istiqamətdə atılan addımlar özünü doğruldur".
Günel CƏLİLOVA
