Xalid Kərimli: "Vətəndaşlarımız özünü nə qədər xoşbəxt hiss edəcəksə, bir o qədər də beynəlxalq reytinqimiz yüksək olacaq"
Prezident İlham Əliyev yerli televiziyalara müsahibəsində beynəlxalq reytinq agentliklərindən sətiraltı narazılığını ifadə edib. Prezident bildirib ki, uzun illər aparılan iqtisadi islahatlar, şəffaflıq, inhisarçılığa qarşı mübarizə, investisiyaların cəlb edilməsi, investisiya iqliminin yaxşılaşdırılması nəticəsində biz beynəlxalq aparıcı reytinq agentliklərinin Azərbaycana olan münasibətində müsbət dəyişiklik görürük.
Yəni onlar da reallıqları inkar edə bilməzlər. Halbuki, mən hesab edirəm ki, bizim beynəlxalq reytinqimiz indikindən daha yüksək səviyyəyə layiqdir və müəyyən səbəblər üzündən hələ ki, aparıcı reytinq agentlikləri daha təvazökar yanaşma sərgiləyirlər.
Prezidentin dilə gətirdiyi, beynəlxalq reytinq agentliklərinin Azərbaycana qarşı "təvazökarlığı" nədən qaynaqlanır?
Baki-xeber.com saytının sualına cavabında iqtisadçı Xalid Kərimli bildirib ki, bəzən ailə başçısı övladını çox sevdiyi üçün onun qüsurlarını görmur, elə bilir ki, övladi ideal bir insandır: "Bir atalar sözümüz də var - heç kim öz ayranına "turş" deməz. Bizim münasibətimizdən asılı olmayaraq, beynəlxalq reytinq agentliklərinin vahid bir qiymətləndirmə metodologiyası var. Bu modelə hər bir ölkənin göstəriciləri yerləşdirilir və nəticə əldə edilir. Bütün ölkələr üçün qiymətləndirmə metodu eynidir, fərqlənən yalnız göstəricilərdir. Ona görə də hər bir ölkənin reytinqi onun nail olduğu göstəricilərdən asılıdır. Beynəlxalq reytinq agentlikləri bir aynadır, bizi olduğumuz kimi əks etdirir. Əgər bu beynəlxalq reytinq agentlikləri əvvəlki dönəmdə də bizə eyni cür yanaşıblarsa və biz onda xoşbəxt idiksə, amma indi xoşbəxt ola bilmiriksə, deməli problem bizim özümüzdədir. Bizdə beynəlxalq reytinq agentliklər ilə məşğul olan komissiya da yaradılıb, bu, analoqu olmayan bir addımdır. Nə üçün yaradılıb, bu da bəlli deyil.
Bizim iqtisadi siyasətimizin məqsədi heç də beynəlxalq reytinq agentliklərində ön sıralara keçmək olmamalıdır. Dövlətin iqtisadi siyasətinin məqsədi vətəndaş rifahını yaxşılaşdırmaq, onun xoşbəxt həyatını təmin etmək olmalıdır. Bunun da konkret göstəriciləri var - hər nəfərə düşən ÜDM, orta aylıq əməkhaqqı, hər nəfərə düşən nominal gəlirlər, həmin nominal gəlirlərin real alıçılıq qabiliyyəti və s. göstəricilər mövcuddur. Əgər bizim bu göstəriciləri yüksəltməyə gücümüz çatmırsa, arzularımız isə bundan çox böyükdürsə, iddialıyıqsa ki, biz daha yüksək pillələrdə olmalıyıq, onda biz öz iqtisadi siyasətimizi təkmilləşdirməli, daha səmərəli işləməliyik. Əgər beynəlxalq reytinq agentliklərinin reytinq göstəriciləri bizim üçün əhəmiyyətlidirsə, aşağı sıralarda olmağımız bizi narahat edirsə, bunun səbəblərini özümüzdə axtarmalıyıq. Biz daha yüksək reytinq istəyiriksə, vətəndaşlarımızın rifah halını yüksəldən iqtisadi göstəricilərimizi artırmalıyıq. Yəni vətəndaşlarımız özünü nə qədər xoşbəxt hiss edəcəksə, bir o qədər də iqtisadiyyatımızın beynəlxalq reytinqi yüksək olacaq. Başqa yol yoxdur".
Dəniz NƏSİRLİ
