Fuad İbrahimov: “Onların Azərbaycana cəlb edilməsi mühüm əhəmiyyət kəsb edir”
“Bərpaolunan enerji sahəsində, harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var”. Bu fikri Prezident İlham Əliyev Almaniya Prezidenti Frank-Valter Ştaynmayer ilə mətbuata bəyanatında səsləndirib.
“Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 qiqavata çatdırmaq fikrindəyik və bu, tam realdır. Bunun bir hissəsi Avropaya ixrac ediləcək”, - deyə Prezident Əliyev vurğulayıb.
Almaniyanın doğrudan da bu sahədə təcrübəsi var. Azərbaycanın alternativ enerji mənbələrində iştirak payı qənaətbəxş sayıla bilərmi? Bu sahədə Almaniya və Azərbaycanın əməkdaşlığı ortaya nə qoyacaq?
“Ən başlıcası odur ki, Almaniyanın özünün bu istiqamətdə Azərbaycana marağı var”
İqtisadçı ekspert Fuad İbrahimov “Bakı-Xəbər”ə şərhində ilk növbədə onu qeyd etdi ki, dünya iqtisadiyyatının tələbat parametrlərində pandemiyadan sonra kifayət qədər dəyişikliklər baş verib. “Bu gün gündəmdə infrastuktur nəqliyyat dəhlizləri və eyni zamanda enerji təhlükəsizliyi parametrlərdə birinci dərəcəli vacib məsələlərdir. Bu iki göstəricisi olan dövlətlər, artıq hesab edin, bölgələrdə, qonşuluq siyasətində liderliyini əldə saxlayacaq. Şübhəsiz, buna dəstək və tənzimlənmiş, tarazlı xarici siyasət tələb olunur. Ola bilsin Rusiyanın, yaxud İranın hər şeyi var, amma tarazlı xarici siyasəti olmadığı üçün o göstəricilər də heç nəyə yararlı deyil. Bu nöqteyi-nəzərdən Azərbaycan bu balansı tam tarazlı şəkildə saxlaya bilir. Xarici siyasətimiz, xoş qonşuluq siyasətimiz öz yerində. Baxırsız, hazırda Almaniya Avropanın iqtisadi baxımdan lokomotivi hesab olunur. Avropa dünyanın ən cazibədar, iqtisadi cəhətdən ödəniş qabiliyyətinin ən yüksək səviyyədə olduğu bir məkandır. Bu məkanla əməkdaşlıq hər zaman bütün ölkələrə maraqlıdır. Bu baxımdan da, Azərbaycan alternativ enerji mənbələrinin inkişafı ilə bağlı, aydın məsələdir ki, ilk növbədə bu sahədə qabaqcıl təcrübəsi olan ölkələrlə əməkdaşlıq edir.
Birləşmiş Ərəb Əmirliklərində bu prosedur son illərdə inkişaf etdirilibsə, regionun ona uyğun olduğunu nəzərə alaraq tətbiqi daha genişdirsə, Almaniya bu sahədə daha institusional səviyyədə illər əvvəl külək enerjisi ilə bağlı kifayət qədər təcrübəsi olan və qabaqcıl şirkətlərə sahib bir dövlətdir. Bu baxımdan bu gün onların Azərbaycana cəlb edilməsi mühüm əhəmiyyət kəsb edir. Ən başlıcası odur ki, Almaniyanın özünün bu istiqamətdə Azərbaycana marağı var. Çünki Azərbaycanın potensialını, Azərbaycan dövlətinin buna yanaşmasını bilirlər, bu sahədə görülən işlər barədə məlumatlıdılar. Ona görə də 2030-cu ilə qədər bu istiqamətdə 6 qiqavata kimi alternativ enerji mənbələrinin istehsal gücünə gətirlib çıxarılması və bunun da ixrac potensialına yönəldilməsi kimi fikir hər tərəfə maraqlıdır”.
F.İbrahimovun sözlərinə görə, çünki Avropa enerji təhlükəsizliyi baxımından Rusiya-Ukrayna müharibə dövründə kifayət qədər təlatüm yaşadı, Avropa iqtisadiyyatı kifayət qədər yükləndi, müəyyən çətinliklər keçirdi. “Burda bilavasitə Almaniya daha çox əziyyət çəkdi. Bu baxımdan, Azərbaycan onlar üçün strateji partnyordur. Nəzərə alsaq ki, ənənəvi enerji təhlükəsizliyi baxmından Azərbaycan artıq bunu sübut etdi. Yəni qaz ixracında dayanıqlı şəkildə qısa zaman kəsiyində 10-a yaxın ölkənin Azərbaycanla əməkdaşlıq etməsi və prosedurlarda Azərbaycanın imzaladığı müqavilələrin icrasında dayanıqlıq nümayiş etdirməsi, eyni zamanda ölkə rəhbərinin bu məsələlərdə yanaşması, sözünə bütöv olması ortadadır.
Serbiya, Macarıstan, Slovakiya prezidentləri hər bir çıxışlarında ayrı-ayrılıqda Azərbaycan prezidentinin sözünə bütöv olduğunu vurğulayıb. Məsələn, Slovakiya prezidenti qeyd edir ki, Azərbaycan prezidentinin sözü kifayətdir ki, müqaviləyə imza atmayaq. Azərbaycanda kişi sözünün çəkisi olduğu üçün bu məsələ bizə xüsusi təsir edir. Bu baxımdan əlbəttə ki, 2030-cu ilə qədər bərpaolunan enerji növlərində 6 qiqavat əlavə istehsal gücünün iqtisadi dövriyyəyə cəlb ediləcəyinə heç şübhəmiz yoxdur. Onunla bağlı kifayət qədər işlər də görülür, eyni zamanda onun ixracı istiqamətində də müəyyən işlər görülür. Qara dənizin dibi ilə alternativ enerji mənbələrinin gücünün ixracı istiqamətində texniki iqtisadi əsaslandırma sənədlərinin də üzərində işlər gedir. Düşünürəm ki, qısa zaman kəsiyində biz bunun faydasının, reallıqda ixracının və ixracdan gələn gəlirinin şahidi olacağıq” - deyə F.İbrahimov bildirdi.
İradə SARIYEVA
