Xalid Kərimli: “Bu gün əmək bazarı bazası Bakıda daha çox inkişaf edib”
Qlobal iqtisadi böhran, dünya iqtisadiyyatında baş verən kataklizmlər məşğulluq, iqtisadi inkişaf və yeni iş yerlərinin açılması kimi mövzuları daha da aktuallaşdırıb.
Bir çox dünya ölkələrində olduğu kimi, yeni iş yerlərinin açılması Azərbaycanda da sosial-iqtisadi inkişafın əsasını təşkil edən başlıca elementlərdəndir. Son məlumatlara görə, ölkəmizdə açılan iş yerlərinin 70-80 faizindən çoxu Bakı şəhərinin payına düşüb. Mütəxəssislərin də dediyi kimi, ölkə əhalisinin, xüsusilə gənclərin sürətli şəkildə paytaxta axını da elə bunun nəticəsidir. Əhalinin çoxu əyalətlərdə yaşadığı halda iş yerlərinin çoxunun paytaxtda açılması narahatlıq yaradır. Hazırda Azərbaycanın bütün rayonlarında böyük infrastruktur layihələri həyata keçirilir, iqtisadiyyatın ayrı-ayrı sektorlarına sərmayələr yatırılır. Lakin regionların sosial-iqtisadi inkişafı ilə bağlı müxtəlif layihə və proqramlar həyata keçirilsə də, bir çox bölgələrdə işsizlik problemi hələ də öz həllini tapmayıb. Maraqlıdır, bu disbalansın səbəbləri nədir?
“Sahibkarlar üçün bölgələrdə münbit mühit yaradılmayanda o gəlib öz işini Bakıda qurmağa meyl göstərir”
İqtisadçı Xalid Kərimli "Bakı-Xəbər"ə açıqlamasında qeyd etdi ki, ölkədə müxtəlif dövrlərdə regionların inkişafı ilə bağlı dövlət proqramları həyata keçirilib, yoxsulluğun azaldılması ilə bağlı bir neçə proqram gerçəkləşdirilib. Amma bu problemin həlli o qədər asan deyil. Rayonlardakı işsizliyi aradan qaldırmaq üçün yeni iş yerləri olmalıdır: "Dövlət öz strukturlarında - təhsil, səhiyyə, icra hakimiyyəti sektorunda nə qədər mümkündürsə, iş yeri açıb. Amma bu çıxış yolu deyil. Sahibkarlıq inkişaf etdirilməlidir ki, özəl sektorda yeni iş yerləri açılsın. Bunun üçün isə özəl sektorun inkişafına şərait yaradılmalıdır. Sahibkarlar üçün bölgələrdə münbit mühit yaradılmayanda o gəlib öz işini Bakıda qurmağa meyl göstərir. Bakı ilə müqayisədə rayonlarda sahibkarlıq fəaliyyəti ilə məşğul olanlara bəzi güzəştlər nəzərdə tutulsa da, rayonlarda qurulan iş mərkəzdə qurulan iş qədər effekt vermir. Hesab edirəm ki, bu, təbii prosesdir. Kiçik sahibkarlara təkcə regionlarda yox, elə Bakının özündə də vergi məsələsində ciddi güzəştlər tətbiq olunmalıdır. Düşünürəm ki, bu onlara stimul vermiş olar. Çünki bu gün əmək bazarı bazası Bakıda daha çox inkişaf edib".
Günel CƏLİLOVA
