Vüqar Bayramov: “Qarşıdakı müddətdə bir sıra müavinətlərdə artım müşahidə olunacaq”
2025-ci ildə icrasına başlanılan sosial paket çərçivəsində artıq bir sıra müavinətlərdə artım reallaşıb. Qeyd edək ki, bu artımlar bu ildən etibarən minimum əmək haqqı məbləğinin dəyişməsi ilə bağlıdır.
Belə ki, Azərbaycanda bəzi sosial müavinətlərin məbləği minimum əmək haqqı ilə birbaşa bağlıdır. Bu baxımdan, minimum əmək haqqındakı dəyişiklik onların məbləğində artımlarla müşahidə olunur.
Qeyd etdiyimiz kimi, Azərbaycanda ilk dəfə olaraq minimum əmək haqqının artımına uyğun olaraq bəzi sosial müavinətlər də artıb. Maraqlıdır, niyə bütün müavinət və təqaüdlərin artımı minimum əmək haqqına bağlanmır?
“Digər müavinətlərin də həcminin minimum əmək haqqı səviyyəsinə çatması üçün Nazirlər Kabinetinə təkliflərin təqdim edilməsi gözlənilir”
Millət vəkili Vüqar Bayramov “Bakı-Xəbər”ə şərhində bildirdi ki, müavinətlər növündən asılı olaraq minimum əmək haqqı və ya minimum pensiyaya uyğun olaraq dəyişir: “Onu da deyim ki, müavinətlərin həcminin artması birbaşa sərəncamla müəyyən olunur. Azərbaycanda bir sıra müavinətlər minimum pensiya və ya minimum əmək haqqı səviyyəsindədir. Ancaq müavinətlərin böyük əksəriyyəti Prezident İlham Əliyevin sərəncamı ilə artırılır. Onu da deyim ki, bir sıra müavinətlər minimum əmək haqqı səviyyəsinə uyğun olaraq artırılıb. Digər müavinətlərin də həcminin minimum əmək haqqı səviyyəsinə çatması üçün Nazirlər Kabinetinə təkliflərin təqdim edilməsi gözlənilir. Təkliflər təqdim ediləndən sonra ölkə başçısı tərəfindən həmin müavinətlərin həcmi artacaq. Nazirlər Kabineti tərəfindən təkliflər bu ayın ikinci yarısı təqdim olunacaq. Ümumiyyətlə, qarşıdakı müddətdə bir sıra müavinətlərdə artım müşahidə olunacaq”.
Həmsöhbətimiz onu da əlavə etdi ki, əhalinin sosial rifahının qorunması Azərbaycan dövlətinin daxili siyasətinin proritet istiqamətidir: “2018-ci ildən başlayaraq sosial müdafiə və sosial rifah sahəsində olduqca böyük işlər görülür və dərin islahatlar aparılır. 2025-ci ildə icrasına başlanılan sosial paket çərçivəsində artıq bir sıra müavinətlərdə artım reallaşıb”.
Günel CƏLİLOVA
