Vüqar Bayramov: “Qlobal təşəbbüslərə ciddi şəkildə töhfə verən Azərbaycana yaşıl enerji sahəsində dəstək göstərilməlidir”
Avropa Komissiyası Avropada sənaye və enerji sektorlarında yaşıl texnologiyaların tətbiqi üçün ümumilikdə 100 milyard avro həcmində dövlət-özəl investisiyaların cəlb olunmasını nəzərdə tutan yeni plan təklif edib. Özəl sektordan investisiyaların cəlb olunması üçün Avropa Komissiyası Avropa İttifaqının cari illik büdcəsindən 2027-ci ilə qədər ümumilikdə 1 milyard avroya qədər maliyyə zəmanəti ayırmağa hazır olduğunu bildirib.
Qeyd edək ki, yaşıl enerji istehsalı sahəsində ən qabaqcıl iş aparan ölkə məhz Azərbaycandır. Necə etmək lazımdır ki, Avropa Komissiyası enerji üçün ayırdığı investisiyadan ölkəmizə də pay ayırsın? Nəzərə almaq lazımdır ki, COP29 Azərbaycanda keçirilib. Bu işdə ölkəmizə dəstək verilməlidir.
“COP29-a ev sahibliyi edən Azərbaycan regionda yaşıl enerji zonasının inkişafına töhfə verən ölkələrdəndir, bu səbəbdən də...”
Millət vəkili Vüqar Bayramov baki-xeber.com-a şərhində qeyd etdi ki, COP-29 müzakirə edilən məsələlərdən biri də yaşıl iqtisadiyyatın maliyyələşdirilməsidir: “Yaşıl iqtisadiyyatın maliyyələşdirilməsi, dünyanın aparıcı beynəlxalq birliklərinin bu istiqamətə daha çox vəsait ayırması da COP29-da müzakirə edilib. COP29-a ev sahibliyi edən Azərbaycan regionda yaşıl enerji zonasının inkişafına töhfə verən ölkələrdəndir. Bu səbəbdən də Azərbaycanın məlum istiqamətdəki təşəbbüsləri dəstəklənməlidir. Nəzərə almaq lazımdır ki, ölkəmiz regionda qlobal təşəbbüslərlə çıxış edir. Ona görə də Avropa İttifaqının yaşıl enerjinin inkişafı ilə bağlı texnoloji, texniki və maliyyə dəstəyinin həyata keçirilməsi məqsədəuyğun olar”.
Həmsöhbətimiz onu da əlavə etdi ki, Azərbaycan yaşıl enerji zonasını dəstəkləyir. Qlobal təşəbbüslərə ciddi şəkildə töhfə verən Azərbaycana yaşıl enerji sahəsində dəstək göstərilməlidir: “Azərbaycanın məlum istiqamətdə təşəbbüsləri aparıcı dövlətlər, birliklər tərəfindən daha yaxından təqdir olunmalıdır”.
Günel CƏLİLOVA
