Əkrəm Həsənov: “Vaxtı keçmiş kreditlərin həcminin artması ölkə iqtisadiyyatına, maliyyə bank sisteminə mənfi təsir edir”
Bu il fevralın 1-nə Azərbaycanda vaxtı keçmiş kreditlərin məbləği 475,1 milyon manat təşkil edib. Qeyd edək ki, bu, yanvarın 1-i ilə müqayisədə 5,8 % çoxdur. Ölkədə problemli kreditlərin məbləği son 1 ildə isə 4,6 % artıb.
Yanvarın sonuna vaxtı keçmiş kreditlərin ümumi kredit portfelində xüsusi çəkisi 1,6 % təşkil edib. Bu nisbət dekabrın sonuna 1,6 %, ötən il yanvarın sonuna isə 1,9 % olub.
Bildirək ki, artıq neçə ildir, ölkədə vaxtı keçmiş kreditlərin həcmi artır. Maraqlıdır, problemli kreditlərin artmasında kommersiya banklarının nə kimi günahı, məsuliyyəti var? Ümumiyyətlə, bu hal insanların rifahına, maliyyə bank sisteminə və ölkə iqtisadiyyatına necə təsir edir?
“Problemli kreditlərin artmasında bankların da günahı var, müştəri kredit götürmək üçün banka müraciət edir, bank isə...”
Bank sahəsi üzrə ekspert Əkrəm Həsənov “Bakı-Xəbər”ə şərhində bildirdi ki, problemli kreditlərin nə səbəbdən artması hər kəsə bəllidir. Bu, ölkədə iqtisadi vəziyyətin get-gedə pisləşməsi ilə bağlıdır. Sahibkarların və sadə vətəndaşların vəziyyəti ildən-ilə dəyişir. Bu səbəbdən də onlar kredit ödənişini vaxtında edə bilmir: “Tendensiya daha da böyüyəcək. Problemli kreditlərin artmasında bankların da günahı var. Müştəri kredit götürmək üçün banka müraciət edir, bank isə tam yoxlamadan vətəndaşa kredit verir. Hazırkı şəraitdə bankların əsas fəaliyyəti elə kredit verib, ordan gəlir əldə etməkdir. Ancaq kimə gəldi kredit verilməməlidir. Ümid edirəm ki, Mərkəzi Bank problemli kreditlərin artması ilə bağlı kommersiya banklarına nəzarət mexanizmini gücləndirəcək. Bu halda kredit verilişi azala bilər”.
Ekspert hesab edir ki, vaxtı keçmiş kreditlərin həcminin artması ölkə iqtisadiyyatına, maliyyə bank sisteminə mənfi təsir edir. Həmçinin, bankların da vəziyyətini çətin hala salır. Ancaq onu da nəzərə almaq lazımdır ki, kredit verilişi azalarsa, bu, biznesin inkişafını ləngidəcək.
Günel CƏLİLOVA
