Qoşqar Salmanlı: “Qiymətləndirmə vahid tarif əsasında həyata keçirilməlidir”
Azərbaycanda bələdiyyələrin qiymətləndirməyə dair səlahiyyəti ləğv edilir. Bununla bağlı “Qiymətləndirmə fəaliyyəti haqqında” qanuna dəyişiklik edilməsi təklif olunur. Qeyd edək ki, sənəd Milli Məclisin Hüquq siyasəti və dövlət quruculuğu komitəsinin iclasında müzakirə edilib.
Dəyişikliklə bələdiyyə mülkiyyətində olan torpaq sahələri fərdi yaşayış evinin tikintisi üçün bilavasitə satıldıqda onların qiymətləri, habelə hərraca və ya müsabiqəyə çıxarılan bələdiyyə mülkiyyətində olan torpaqların ilkin qiyməti normativ qiymətdən az olmamaq şərtilə bazar məzənnələri nəzərə alınmaqla, “Qiymətləndirmə fəaliyyəti haqqında” qanuna uyğun olaraq müəyyən ediləcək. İndiyə qədər bu qiyməti yerli özünü idarəetmə orqanları müstəqil şəkildə müəyyən edirdi.
Qeyd etdiyimiz kimi, bələdiyyələrin qiymətləndirməyə dair səlahiyyəti ləğv edilir. Maraqlıdır, bələdiyyələr bu səlahiyyətdən necə istifadə edib? Bu sahədə hər hansı bir problem yaşanıbmı ki, səlahiyyət geri alınır?
“Qiymətləndirmə nəticəsində bəzən elə olurdu ki, bələdiyyələr bilərəkdən aşağı qiymətlə hesablayıb, torpaqları öz yaxın adamlarına icarəyə verirdi”
Bələdiyyə sahəsi üzrə ekspert Qoşqar Salmanlı “Bakı-Xəbər”ə şərhində bildirdi ki, “Qiymətləndirmə fəaliyyəti haqqında” qanunda müəyyən boşluqlar var idi. Bu boşluqlardan da bəzi bələdiyyələr öz bildiyi kimi istifadə edirdi: “Qiymətləndirməni bələdiyyələrin özü həyata keçirirdi. Qiymətləndirmə nəticəsində bəzən elə olurdu ki, bələdiyyələr bilərəkdən aşağı qiymətlə hesablayıb, torpaqları öz yaxın adamlarına icarəyə verirdi. Əsasən bu hal Bakı və Bakıətrafı ərazilərdə müşahidə olunurdu. Onu da deyim ki, Masazır, Badamdar ərazisində, eləcə də Bakıətrafı qəsəbələrin bir çoxunda qiymətləndirmə düzgün aparılmayıb. Bunun nəticəsində çoxsaylı torpaq sahələri ucuz qiymətə icarəyə verilib. Danılmaz faktdır ki, Bakı və ətraf ərazilərdə bələdiyyələr tərəfindən icarəyə verilmiş böyük torpaq sahələri var.
Bu səbəbdən də hesab edirəm ki, Milli Məclisin məlum qərarı müsbət dəyişikliyə səbəb olacaq. Qiymətləndirmə vahid tarif əsasında həyata keçirilməlidir”.
Günel CƏLİLOVA
