Kamran Məmmədli: “İdxala üstünlük verilməsinin səbəbi yerli istehsal mebellərə inamın az olması ilə bağlıdır”
Qeyri-neft sektorunun inkişafı ölkə siyasətinin aparıcı istiqamətlərindən biridir. Qeyri-neft sektorunun əsas sahələrindən birini də mebel sənayesi təşkil edir. Mebel sənayesinin inkişafı istiqamətində ölkədə müəyyən işlər görülür. Ölkədə müxtəlif adlarla mebel fabrikləri fəaliyyət göstərir. Həmin fabriklərdə çeşid-çeşid mebel istehsal olunur.
Buna baxmayaraq, 2024-cü ilin yanvar-noyabr ayları ərzində Azərbaycana 150 milyon 114 min ABŞ dolları dəyərində mebel və onun hissələri idxal edilib. Bu göstərici əvvəlki ilin müvafiq dövrü ilə müqayisədə 24.2 faiz və ya 29 milyon 267 min ABŞ dolları çoxdur. Qeyd etdiyimiz kimi, daxildə də mebel istehsal olunur. Yerli istehsal olduğu halda, niyə idxala üstünlük verilir?
“Bizim məhsullarımızın keyfiyyəti heç də xarici məhsuldan geri qalmır, hətta ağacımız daha keyfiyyətlidir”
Iqtisadçı Kamran Məmmədli “Bakı-Xəbər”ə şərhində bildirdi ki, son zamanlar idxal olunan mebellərlə yanaşı, yerli istehsala da üstünlük verilir: “İdxala üstünlük verilməsinin səbəbi yerli istehsal olan mebellərə inamın az olması ilə bağlıdır. Xaricdən mebel idxalının azalması üçün yerli istehsala aid olan mebellərə inam artmalıdır. İnam artarsa, o zaman yerli istesal olan mebellərin alışına da maraq artacaq. Ona görə də, başlıca olaraq, bu istiqamətdə inamın formalaşdırılması üçün işlər görülməlidir. Unutmaq lazım deyil ki, bu sahədə yaxşı fəaliyyət göstərən müəssisələr var. Yerli istehsal olan mebellərə tələbin artması üçün onlara olan inamı artırmaqla bağlı işlər görülməlidir. Müvafiq qurumlar, şirkətlər yerli istehsala aid olan mebelləri almaqla digərlərinə nümunə olmalıdırlar. Bununla bağlı fəal olmalıdırlar. Eyni zamanda, yerli mebel istehsalını daha da artırmaq lazımdır. İnam və maraq artarsa, xaricdən mebel idxalı nəzərəçarpacaq dərəcədə azalacaq. Nəticədə daha çox yerli məhsul istehsal olunacaq və xaricə mebel idxalı ilə bağlı valyuta axmaz. Onu da deyim ki, bizim məhsullarımızın keyfiyyəti heç də xarici məhsuldan geri qalmır. Hətta ağacımız daha keyfiyyətlidir”.
Günel CƏLİLOVA
