Əkrəm Həsənov: “Müştərilər daha çox bank kreditləri ilə bağlı narazılıq edir”
Azərbaycan Mərkəzi Bankı (AMB) cari ilin yanvar ayı ərzində bank müştәrilәrinin bank xidmәtlәrindәn istifadәsi üzrә şikayәt indeksini açıqlayıb.
2025-ci ilin yanvar ayında Azərbaycanda ən çox şikayət edilən bank 2.92 indeksi ilə “Yapı Kredi Bank Azərbaycan” seçilib.
Maraqlıdır, müştərilərin narazı qaldığı məqamlar nədir?
“Banklar bəzən kredit borcunu düzgün hesablamır, girovu qaytarmır, kredit vermir, vətəndaşa da...”
Bank sahəsi üzrə ekspert Əkrəm Həsənov “Bakı-Xəbər”ə şərhində bildirdi ki, müştərilər daha çox bank kreditləri ilə bağlı narazılıq edir: "Banklar bəzən kredit borcunu düzgün hesablamır, girovu qaytarmır, kredit vermir, vətəndaşa daha çox borc yazılır. Bu da təbii olaraq narazılığa səbəb olur. Bununla yanaşı, bank əmanətləri, kartlardan vəsaitin anidən silinməsi, pul köçürmələrilə də bağlı problem olur. Bu kimi problemlərin sayı çoxdur. Kartdan pul silinməsi halı adıçəkilən banklarda elə də çox olmur. Ən çox şikayət olunan banklar vətəndaşlarla işləyənlərdir. Onu da deyim ki, şikayəti daha çox vətəndaşlar edir. Amma bütün banklarımız vətəndaşlarla işləmir. Məsələn, bir neçə bank var ki, onlar istehlakçılarla daha az işləyir, daha çox müştəriləri sahibkarlardır”.
Həmsöhbətimiz onu da əlavə etdi ki, bu şikayətlərin hamısının əsaslı olduğunu demək olmaz: “Bu şikayətlərdə kəmiyyət önəmli deyil. Ola bilər ki, hansısa bankdan şikayət daha az ola bilər, amma daha da əsaslı olar. Bundan başqa, elə banklar var ki, artıq onlar haqqında insanlar şikayət etmək istəmir. İnsanlar düşünür ki, onsuz da bu banklardan şikayət etməyin mənası yoxdur”.
Ekspert hesab edir ki, ən çox şikayət olunan bankların hazırda bağlanma təhlükəsi yoxdur. Vətəndaşların banklardan narazı qalması onların fəaliyyətinə heç bir təsir etməyəcək: "Çünki bu bankların reytinq siyahısı ilə tanış olmuşam. Reytinqlər dəyişkən olur və heç bir hüquqi əsası yoxdur. Onu da deyim ki, narazılıqlar olduğu zaman belə reytinqin olması normaldır. Növbəti illərdə müştəri narazılığının aradan qaldırılması üçün adıçəkilən bank öz üzərində çalışacaq”.
Günel CƏLİLOVA
