Son zamanlar Azərbaycanda səfərdə olan diplomatlar, səfirliklərin rəsmiləri təmsil etdikləri ölkələrin Azərbaycanın işğaldan azad olunmuş ərazilərinin bərpasında iştirak etməkdə maraqlı olduqlarını bildirirlər. Bununla bağlı müxtəlif təkliflərlə çıxış edirlər.
Amerika Birləşmiş Ştatlarının Azərbaycandakı səfiri Li Litzenberger də bu barədə öz fikirlərini səsləndirib. Belə ki, səfir işğaldan azad olunmuş ərazilərdə ABŞ şirkətlərinin mümkün iştirakçılığı barədə danışıb. Ancaq bununla bağlı o qeyd edib ki, Azərbaycan Birləşmiş Ştatların daha çox şirkətinin işğaldan azad edilmiş rayonların bərpasında iştirakını istəyirsə, o zaman tenderlər açıq olmalıdır: “Azərbaycan ABŞ-ın daha çox şirkətinin investisiya qoymasında maraqlıdırsa, açıq tender keçirməsini tövsiyə edirəm. Bu tenderlər vasitəsilə Birləşmiş Ştatlar şirkətləri müraciət edə bilərlər. Bununla da Azərbaycanın hansı istiqamətlərdə maraqlı olduğunu və buradakı inkişafa öz töhfələrini verə biləcəklərini dəqiq bilərlər”.
ABŞ səfirinin tenderlər barəsində şübhəli danışması diqqəti cəlb edir. O üzdən maraqlıdır, səfir bununla nə demək istəyir və onun tenderlərlə bağlı şübhələri nə dərəcədə əsaslıdır?
“İşğaldan azad olunmuş ərazilərin bərpasında daha çox xarici şirkətin iştirakını istəyiriksə...”
Məsələyə münasibət bildirən iqtisadçı alim, professor Əli Əlirzayevin fikrincə, ABŞ kimi ölkənin səfirinin tenderlərlə bağlı belə danışması təsadüfə oxşamır: “Ola bilsin, onların bizdə keçirilən tenderlərlə bağlı şübhələri var. O üzdən belə bir fikir səsləndirib. Hesab edirlər ki, tendrlər açıq deyil. Tender əslində aşkar və şəffaf keçirilməlidir. Hansı şirkət sərfəli şərtlər təklif edirsə, ona üstünlük verməlidir. Məlum olmalıdır ki, hər hansı layihəyə nə qədər sərmayə qoyulacaq, gəliri nə qədərdir. Ortada real rəqabət mühiti olmalıdır. Bu rəqabət şəraitinə uyğun olaraq da hansı təklif daha sərfəlidirsə, ona üstünlük verilməlidir. Hesab edirəm ki, tenderlərin açıq və şəffaf olması çox vacibdir. Yoxsa tenderlər formal keçirilirsə, o zaman xarici şirkətlər elə də maraq göstərməyəcəklər. İşğaldan azad olunmuş ərazilərin bərpasında daha çox xarici şirkətin iştirakını istəyiriksə, o zaman keçirilən tenderlər maksimum şəffaf olmalıdır. Bunu yüksək səviyyədə təmin edə bilsək, o zaman bərpa işləri daha sürətlə gedəcək. Nəzərə almaq lazımdır ki, daha çox xarici şirkətin bu prosesə qoşulması daha çox sərmayənin ölkəyə gəlməsi deməkdir. Unutmaq olmaz ki, görüləsi işlər çoxdur. Çünki ermənilər hər şeyi məhv edib”.
Bir sözlə, professor hesab edir ki, tenderlər açıq və rəqabət şəraitində keçirilməlidir.
Vidadi ORDAHALLI
