Xarici investorların Azərbaycan iqtisadiyyatının vəziyyəti ilə bağlı rəyi açıqlanıb. Belə ki, xarici investorların 39%-i Azərbaycan iqtisadiyyatını sabit hesab edir. Bu barədə İqtisadiyyat Nazirliyinin, Azərbaycanda İxracın və İnvestisiyaların Təşviqi Fondunun (AZPROMO) və Alman-Azərbaycan Xarici Ticarət Palatasının (AHK) təşkilatçılığı ilə hazırlanmış "Azərbaycanda xarici biznes: Biznes mühiti sorğusu 2020” hesabatında bildirilir.
Hesabatda qeyd edilir ki, investorların cəmi 2%-i milli iqtisadiyyatın güclü olması qənaətindədir. Rəyi soruşulanların 39%-i iqtisadi vəziyyəti sabit, 34%-i tənəzzüldə olan kimi qiymətləndirib, 25%-i isə müəyyənləşdirə bilmədiyini qeyd edib.
Bundan başqa, xarici investorların 73%-i təşviq proqramlarına, 70%-i məhkəmə sisteminə, 67%-i isə vergi sisteminə sərmayə yatırmağın əhəmiyyətini vurğulayıb.
Xatırladaq ki, hesabat üçün 32 ölkədə fəaliyyət göstərən 450 şirkətə biznes sorğu göndərilib. Onların 27 %-i Almaniya, 11 %-i Böyük Britaniya, 4 %-i Türkiyə, 7 %-i ABŞ, qalan 51 %-i isə digər ölkələri təmsil edib. Sorğu iştirakçılarının 63 %-ni isə Azərbaycanda biznes fəaliyyəti olan şirkətlər təşkil edib.
Azərbaycan iqtisadiyyatının inkişaf etməsi xarici investorların diqqətini cəlb edir. Danılmaz faktdır ki, investorlar üçün əsas şərt sabit mühitdir. Təbii ki, bu hal ölkəmizdə olduğu üçün xarici investorlar sərmayə yatırmaqda maraqlıdırlar.
“Azərbaycana investisiya qoyuluşuna marağın getdikcə artması ölkəmizin siyasi cəhətdən sabit olması, milli, dini və irqi tolerantlıq baxımından seçilməsi ilə bağlıdır”
İqtisadçı Kamran Məmmədli bildirdi ki, investisiya mövzusu dünyada çox həssas hesab edilən bir mövzudur. Xüsusilə Azərbaycan kimi inkişaf etmək yoluna qədəm qoymuş ölkələr investisiya cəlbediciliyini artırmağa daha çox can atırlar. Çünki investisiyasız inkişaf mümkün deyil: “Xarici investor bir ölkəyə vəsait yatıranda onu maraqlandıran əsas məsələ daha tez gəlir götürmək olur. Ona görə də xarici investorlar ən çox xammal əldə olunan sahələrə meyl göstərirlər ki, maliyyə vəsaiti yatıraraq xammal əldə etsinlər və onun dərhal satışını həyata keçirsinlər. Onlar hansısa müəssisə yaratmağa, emal sahəsində infrastruktur qurmağa, birgə müəssisələr təşkil etməyə və məhsul istehsal edib yerli ölkənin adıyla daxili və ya xarici bazarda satmağa bir o qədər maraq göstərmirlər. Gərək ölkədə son dərəcədə əlverişli investisiya mühiti yaradılsın ki, xarici investor bu sahələrə də vəsait yatırsın. Son illər Azərbaycanda dövlət səviyyəsində mövcud investisiya mühitinin daha da yaxşılaşdırılması üçün xeyli iş görülür. Xüsusən də qeyri-neft sektoruna xarici investorların cəlbi üçün vergi və digər sahələrdə yumşaltmalar edilməkdə, güzəştli xarakter daşıyan addımlar atılmaqdadır”.
Həmsöhbətimiz onu da əlavə etdi ki, Azərbaycana investisiya qoyuluşuna marağın getdikcə artması ölkəmizin siyasi cəhətdən sabit olması, milli, dini və irqi tolerantlıq baxımından seçilməsi ilə bağlıdır.
Günel CƏLİLOVA
