Torpaqlarımızın azadlığı, vətənimizin müstəqilliyi və bütövlüyü uğrunda şəhid olmuş hərbi qulluqçuların ailələrinin dərdi nə qədər dərin olsa da, qürur hissləri də bir o qədər böyükdür. Bu hissləri onlara bəxş edən Vətən, torpaq sevgisi, dövlətimizin şəhidlərin ruhuna bəslədiyi ehtiram və onların ailələrinə tükənməyən qayğısıdır.
Bildiyimiz kimi, şəhid ailələrinə diqqət və qayğı dövlət başçımızın xüsusi nəzarətindədir. Dövlətimiz Azərbaycanın ərazi bütövlüyü uğrunda vuruşanları, canını fəda edənləri heç vaxt unutmur, onlara və ailələrinə hər zaman həssaslıqla yanaşır.
Bu səbəbdən də Azərbaycan Respublikası Prezidentinin təqaüdünün məbləğinin I dərəcə əlilliyi olan şəxslərə 250 manatdan 400 manatadək, II dərəcə əlilliyi olan şəxslərə 230 manatdan 350 manatadək, III dərəcə əlilliyi olan şəxslərə 210 manatdan 300 manatadək artırılması təklif olunur.
“Əmək pensiyaları haqqında” Qanunun 19-cu maddəsinin (Əmək pensiyasının sığorta hissəsinə əlavələr) ləğv edilməsi və bundan irəli gələrək digər qanunlarda dəyişikliklər edilməsi təklif olunur. Həmçinin, I dərəcə əlilliyi müəyyən edilmiş şəxslərə qulluq edənlərə 50 manat məbləğində Azərbaycan Respublikası Prezidentinin təqaüdü ödəniləcək.
Bundan əlavə, Azərbaycan Respublikasının ərazi bütövlüyünün müdafiəsi zamanı əlilliyi müəyyən edilmiş bütün şəxslərin uşaqları, Azərbaycan Respublikasının ərazi bütövlüyünün müdafiəsi zamanı I və II dərəcə əlilliyi müəyyən edilmiş şəxslərin özləri təhsil haqqını ödəməkdən azad ediləcək.
“Qarabağ müharibəsi əlillərinə və veteranlarına diqqət və qayğı davamlı xarakter daşıyır”
Sosial sahə üzrə ekspert Mayis Əliyev bildirdi ki, Azərbaycan sosial dövlətdir. Ökəmizdə əhalinin sosial müdafiəsinin gücləndirilməsi, sosial rifah halının daha da yüksəldilməsi daim diqqət mərkəzindədir: “Bu mənada, dövlətimizin şəhid ailələrinə, Qarabağ müharibəsi əlillərinə və veteranlarına yüksək qayğısı xüsusilə qeyd olunmalıdır. Bu kateqoriyadan olan insanlara diqqət və qayğı davamlı xarakter daşıyır”.
Həmsöhbətimiz onu da əlavə etdi ki, müharibə əlilləri və şəhid övladları təhsil haqqından azad olmalıdırlar. Bu kateqoriyadan ailələrə daim diqqət və qayğı göstərilməlidir: “Ümumiyyətlə, bu tip ailələrin övladları bütün xidmətlərin ödənişindən azad olmalıdırlar. O uşaqların ödənişini ataları vətən uğrunda gedən döyüşlərdə ödəyib. Məlumdur ki, məcburi köçkünlərin övladları təhsil haqqından azad idilər. Artıq pulsuz təhsil hüququ şəhid övladlarına şamil edilməlidir. Eyni zamanda, müharibə əlillərinin övladlarına da bu güzəşt şamil olunmalıdır”.
Son olaraq bildirək ki, Qarabağ müharibəsi əlilləri və veteranlarına hörmət və ehtiram bütün cəmiyyətimizdə xarakterik haldır. Çünki Azərbaycanın ərazi bütövlüyü uğrunda mübarizə aparmış və hazırda bu mübarizənin iştirakçısı olan şəxslərə diqqət və ehtiramla yanaşmaq hər birimizin mənəvi vəzifəsidir.
Günel CƏLİLOVA
