Fuad İbrahimov: “…MDB ölkələrinə ixrac artır”
Azərbaycan MDB ölkələrinə məhsul ixracını artırıb. Cari ilin yanvar-oktyabr aylarında Azərbaycandan MDB ölkələrinə 1 milyard 95 milyon 513 min ABŞ dolları dəyərində məhsul ixrac edilib. Bu göstərici 2019-cu ilin müvafiq dövrünə nisbətən 115 milyon 481 min dollar çoxdur. Bu ilin on ayında Azərbaycanın MDB ölkələrindən idxal etdiyi məhsulun dəyəri isə 2 milyard 274 milyon 160 min dollar olub.
Onu da qeyd edək ki, pandemiya dövründə Azərbaycanın məhsul ixracının artması ölkənin əldə etdiyi iqtisadi üstünlüklərindən biri sayılır.
- “2019-cu ildə ölkə iqtisadiyyatında yetərincə dinamik inkişaf var idi və bu inkişaf cari ildə də davam edir”
Məsələyə münasibət bildirən iqtisadçı-ekspert Fuad İbrahimovun sözlərinə görə, Azərbaycanın qeyri-neft sektorunda dinamik inkişaf getdiyi üçün MDB ölkələrinə ixrac azalmayıb: “Nəzərə almaq lazımdır ki, 2015-ci ildən sonra ölkə rəhbəri tərəfindən qeyri-neft sektorunun inkişafına dair bir sıra fərmanlar verildi, “Yol xəritələri” hazırlandı. Bu istiqamətdə kifayət qədər iş gedir. 2019-cu ildə ölkə iqtisadiyyatında yetərincə dinamik inkişaf var idi və bu inkişaf 2020-ci ilin birinci yarısına qədər davam etdi. Ancaq pandemiya müşahidə olunan inkişafa mənfi təsir etdi. Bütün dünya ölkələrində idxal-ixrac əməliyyatları azaldı. Yaşananlara baxmayaraq, Azərbaycanın qeyri-neft sektoru inkişafdadır. Bunun nəticəsidir ki, Azərbaycanın MDB dövlətlərinə ixracı artıb. Bu onun göstəricisidir ki, Azərbaycanın qeyri-neft sektorunda inkişaf dayanmayıb. Baxmayaraq ki, pandemiya gediş-gəlişə mənfi təsir edir, amma bizdə artım var. Yəni ölkənin qeyri-neft sektorunda dinamik inkişafla əlaqədar olaraq MDB ölkələrinə ixrac artır. Düşünürəm ki, postpandemiya dövründə artıq inkişaf daha geniş sferanı əhatə edəcək. Postpandemiya dövründə Azərbaycanın inkişafı daha sürətlə gedəcək”.
Günel CƏLİLOVA
