“Biz elə addımlar atmalıyıq ki, postpandemiya dövrünə ən hazırlıqlı ölkələr sırasında olaq”. Bu sözləri Prezident İlham Əliyev Sumqayıt Kimya Sənaye Parkının nəzdindəki Peşə Təhsil Mərkəzinin açılışında deyib.
Ölkə başçısının sözlərinə görə, investorların Azərbaycana marağı artır: “Xarici investorların ölkəmizə marağı artır, mən yerli investorları da istiqamətləndirmişəm ki, Azərbaycana pul qoysunlar. Beləliklə, burada inkişaf o qədər sürətli olmalıdır ki, həm işsizlik aşağı səviyyədə olsun, həm idxaldan asılılıq minimuma endirilsin, həm də ixrac qabiliyyətli məhsullar istehsal edilsin. Əgər biz bütün bu amilləri düzgün istiqamətə səfərbər edə bilsək, onda Azərbaycana investisiya axını dayanmayacaq. Bizim də əsas məqsədimiz budur. Xüsusilə dünyada yaşanan, pandemiya nəticəsində dərinləşən böhran, əlbəttə ki, bir çox şirkətlərə mənfi təsir göstərib. Ancaq məhz bu şəraitdə biz elə addımlar atmalıyıq ki, postpandemiya dövrünə ən hazırlıqlı ölkələr sırasında olaq və dərhal, vaxt itirmədən yeni inkişaf dinamikasına sahib olaq”.
Bütün bu deyilənlərin fonunda, Azərbaycanın postpandemiya dövrünə hazırlıqlı olmağına nə qədər şansları var? Bununla bağlı nələrə diqqət edilməlidir?
“...sahibkarlıq subyektlərinə tətbiq edilməsinə ehtiyac var”
Sözügedən məsələ ilə bağlı fikirlərini “Bakı-Xəbər”lə bölüşən İqtisadi Resursların Öyrənilməsi Mərkəzinin direktoru Ruslan Atakişiyevin fikrincə, Azərbaycanın bununla bağlı şansı var: “Bununla bağlı çıxış yolu imkanları var. Postpandemiya dövrünə hazırlıqlı olmaq üçün strategiya düzgün həyata keçirilməlidir. Biz dəqiq strategiyanı müəyyən etsək və o istiqamətdə ardıcıl addımlar atsaq, o zaman postpandemiya dövrünə daha hazırlıqlı ola bilərik. Bunlar nədən ibarətdir? Bunun mahiyyəti ondan ibarətdir ki, biz daha tez mövcud vəziyyətə və şəraitə uyğunlaşmalıyıq. Bununla yanaşı, pandemiya zəifləsə də, cilovlansa da, dezinfeksiya işləri illərlə davam edəcək. Ona görə də, birinci növbədə, qaydalara riayət olunması məsələsinin sahibkarlıq subyektlərinə tətbiq edilməsinə ehtiyac var. İkinci məsələ odur ki, postpandemiya dövrü üçün yeni sahələr var. Həmin sahələr daha çox prioritet əhəmiyyət kəsb edir. Hesab edirəm ki, Azərbaycanda həmin sahələrin inkişafına xüsusi diqqət yetirilməlidir. Digər bir məsələ ondan ibarətdir ki, ölkədə investisiya və sahibkarlıq mühiti daha da inkişaf etdirilməlidir. Rəqabət Məcəlləsi qəbul olunmalıdır. Yəni açıq bazar iqtisadiyyatını genişləndirməklə yanaşı, milli ruhlu sahibkarlar sinfinin formalaşdırılmasına da önəm verilməlidir”.
Ekspert yekun olaraq qeyd etdi ki, bütün bu məsələlərə kompleks yanaşılmalıdır.
Vidadi ORDAHALLI
