Vüqar Bayramov: “Başlıca olaraq müəssisələrin yeri düzgün seçilməli və onların fəaliyyəti səmərəli qurulmalıdır”
“Sənaye Parkının gələcək inkişafı ilə bağlı təkliflər hazırlayın, yerləri seçin”. Bu fikirləri Prezident İlham Əliyev Sumqayıt Kimya Sənaye Parkının nəzdindəki Peşə Təhsil Mərkəzinin açılışında deyib.
Dövlət başçısı mərasimdə bildirib: “Çünki yenə də deyirəm, belə templə ki, biz gedirik, 2-3 ilə bütün bu yerlər dolacaq və 508 hektarda yer qalmayacaq. Ona görə baxın, harada biz bunu davam etdirə bilərik. Şərt deyil ki, bu əraziyə bitişik olsun, buradan bir qədər kənarda ola bilər, amma əsas odur ki, bu yerə rezident statusu veriləcəkdir. Təmizlik, kommunikasiya işlərinə bəlkə də elə bu ildən, vaxt itirmədən başlamaq olar. Çünki bu da vaxt aparacaq. Biz o zaman bu ərazini təmizləyəndə buna təqribən bir il vaxt lazım oldu. Həm təmizləmə, ondan sonra kommunikasiya işləri. Ona görə bəlkə ilin sonuna qədər müəyyən vəsait də ayrıla bilər ki, yeni seçilmiş yerdə biz bu işləri görək, növbəti investorlar artıq maraq göstərəndə vaxt itirməsinlər”.
Məlumat üçün qeyd edək ki, Sumqayıt Kimya Sənaye Parkı Prezident İlham Əliyevin 2011-ci il 21 dekabr tarixli Fərmanı ilə yaradılıb. 2013-cü il oktyabrın 3-də Sənaye Parkının təməlqoyma mərasimi keçirilib. Sumqayıt şəhərində yerləşən və nəhəng infrastruktura malik Sumqayıt Kimya Sənaye Parkının ərazisi 508,14 hektar təşkil edir. Sənaye Parkının ərazisində neft-kimya və digər prioritet sənaye sahələri üzrə rəqabətqabiliyyətli məhsulların (işlərin, xidmətlərin) istehsalı və emalı müəssisələri yaradılır. Hazırda Sənaye Parkında 24 rezident var. 2015-ci il oktyabrın 25-də Sumqayıt Kimya Sənaye Parkının rezidentləri olan "Azertexnolayn" MMC-nin Texniki avadanlıqlar zavodunun açılışında “SOCAR Polymer” MMC-nin Yüksək sıxlıqlı polietilen zavodunun təməlqoyma mərasimi keçirilib. Sonrakı illərdə də bir neçə müəssisə və zavod açılıb. 2020-ci il 6 apreldə isə parkda yerləşən “Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışı olub. Nəticədə maskaya olan tələbat yerli istehsal hesabına təmin edilir.
Maraqlıdır, Prezidentin tövsiyələrindən çıxış edərək, Sumqayıt Kimya Sənaye Parkında nələri necə qurmaq olar? Nəyi necə dəyişdirmək olar ki, ölkə başçısının nəzərdə tutduğu məqamlar orada öz əksini tapsın?
- “Perspektiv olaraq idxaldan asılılığın aradan qaldırılması və...”
Məsələyə münasibət bildirən millət vəkili Vüqar Bayramov bununla bağlı bir sıra məqamlara toxundu: “Başlıca olaraq müəssisələrin yeri düzgün seçilməli və onların fəaliyyəti səmərəli qurulmalıdır. Hesab edirəm ki, bu kimi məsələlərə xüsusi diqqət edilməlidir. Çünki bu çox vacib və önəmli faktordur. Eyni zamanda, istehsal olunan məhsula olan tələbatı nəzərə almaq lazımdır. Həmçinin, məhsulun rəqabət qabiliyyəti yüksək olmalıdır. Güman olunur ki, Peşə Təhsil Mərkəzinin istifadəyə verilməsi parkın innovativ məhsul istehsalına pozitiv təsir göstərəcək. Sumqayıt Kimya Sənaye Parkı milli istehsalın, eyni zamanda, Azərbaycanın ixracatının formalaşmasında artıq xüsusi paya malik olmaqdadır. Təbii ki, perspektiv olaraq həm idxalın aradan qaldırılmasında, həm də ixrac imkanlarının genişləndirilməsində bu parkın rolunun artacağı gözlənir. Perspektiv olaraq, idxaldan asılılığın aradan qaldırılması və ixrac imkanlarının genişləndirilməsində bu parkın rolunun yaxın müddətdə daha da artacağı gözlənir. Yeni müəssisələrin istifadəyə verilməsi və Peşə Təhsil Mərkəzinin açılışı parkın gələcəkdə innovativ məhsulların istehsalını daha da genişləndirəcəyindən xəbər verir. Bu kontekstdən yanaşdıqda həm pandemiya, həm də postpandemiya dövründə yerli istehsalın dəstəklənməsi Azərbaycan üçün prioritetdir. Bu da, nəticə etibarilə, qeyri-neft sektorunda müqayisəli məhsul istehsalının artması deməkdir. Hesab edirəm ki, ixrac imkanlarının genişləndirilməsində Sumqayıt Kimya Sənaye Parkı xüsusi paya malik olacaq. Yerli məhsulların bazara çıxarılması idxaldan asılılığın aradan qaldırılmasına xidmət edir. Bu həm də valyutanın ölkədən kənara çıxmasının qarşısını almaq baxımından çox vacibdir”.
Millət vəkilinin fikrincə, parkın böyük potensialı var.
Vidadi ORDAHALLI
