Azərbaycanda inşaat sektoru iqtisadiyyatın neft qiymətlərinin düşməsi fonunda ən həssas sektorudur. Bunu karbohidrogen qiymətlərinin əvvəlki enişindən sonra müşahidə etdik və bu gün həmin vəziyyət təkrarlanır.
Məlumatlara görə, bu ilin son yeddi ayında bu sahədə artım tempi keçən ilin hesabat dövrü ilə müqayisədə 16,8% azalıb. Devalvasiyadan keçən bütün illər ərzində əmlak bazarı maliyyə dəyişkənliyinin yaratdığı böhran hadisələrindən uzaqlaşırdı. Neft indekslərinin tədricən artması bu sahədə nisbi sabitliyə gətirib çıxardı. 2017-ci ilin sonuna hətta inkişaf dinamikası da nəzərə çarpırdı.
Eyni zamanda, tikinti bazarının artımı yerli tikinti məhsullarının və ixrac mövqelərinin artmasına təkan verən əmək bazarını bərpa edirdi. Artıq keçən il davamlı olaraq yüksək neft qiymətləri fonunda inşaat sektoru əvvəlki ilə nisbətən 3,9 dəfə artdı və 8 milyon 747,3 min kvadratmetrlik mənzil tikilib istifadəyə verildi.
Pandemiya ilə bağlı olaraq, əksər sahədə olduğu kimi, tikinti sektorunda da nisbi durğunluq yaşandı. Ancaq görülən işlər sayəsində bu sahədə yaşanan probem qısa müddətdə öz həllini tapacaq.
Prezident İlham Əliyev Sumqayıt Kimya Sənaye Parkının nəzdindəki Peşə Təhsil Mərkəzinin açılışında iştirak edərkən bu məsələyə toxunub. O qeyd edib ki, Sumqayıt bu gün nəinki Azərbaycanın, Cənubi Qafqazın ikinci böyük sənaye mərkəzidir. Sumqayıtın potensialı daha da güclənir. Bu il burada şüşə istehsalı zavodu da fəaliyyətə başlayacaq: “Oraya da böyük investisiyalar qoyulub və bizi şüşə ilə təmin edəcəkdir. Baxmayaraq ki, indi tikinti sektoru pandemiyaya görə bir qədər tənəzzülə uğrayıb, amma o, bərpa edilir və ediləcək. Biz özümüzü yerli şüşələrlə təmin edəcəyik. Bu da böyük nailiyyətdir”.
İqtisadçı-ekspert Fuad İbrahimli bildirdi ki, inşaat sektoru olduqca geniş anlamı ifadə edir. Bura yol tikintisi, inşaat materiallarının istehsalat sahələri, fərdi evlərin, yaşayış binalarının tikintisi də aiddir. Bu gün də bu sahəyə böyük tələbat var: “Son illər ildə 100-150 çoxmərtəbəli yaşayış binasının tikintisi olur. Eyni zamanda da fərdi evlərin inşasının xüsusən də regionlarda kütləvi şəkildə davam etdiyini nəzərə almalıyıq. Belə hesab olunur ki, pandemiya dövründə də bu sahə, eyni zamanda, tikintidən sonrakı prosesdə, təmir zamanı önəmli olan avadanlıq və aksesuarlara, materiallara tələbat dayanmayacaq. Bu sahəyə tələbat olduqca, insanlar yenə əmlak, ev alacaqlar. Belə olan halda, təbii ki, pul dövriyyəsi olacaq ki, bu da yeni inşaat materialları əldə etməyə imkan verəcək. Tikinti sektorunun inkişafı boya, qapı-pəncərə, kabel, keramika, alçipan, kərpic-armatur istehsalına da müsbət töhfəsini vermiş olacaq. Bu, yüzlərlə şirkətin inkişafına yol açır. Hansı ki, həmin şirkətlərin də, eyni zamanda, işçi qüvvəsinə müsbət təsir edir”.
Həmsöhbətimiz onu da əlavə etdi ki, pandemiya ilə bağlı tikinti sektorunda müəyyən durğunluq yaşandı və bu problem qısa müddət ərzində öz həllini tapacaq.
Günel CƏLİLOVA
