Avropa Liqasının "pley-off" mərhələsində "Qarabağ" klubu İsveçrənin "Yanq Boyz" klubunu qəbul edib. Tofiq Bəhramov adına Respublika Stadionunda keçirilən görüşü litvalı FIFA referisi Gediminas Majeyka idarə edib. "Qarabağ"ın rəqibi darmadağın etdiyi oyun 3:0 hesabı ilə başa çatıb.
"Qarabağ" Berndəki oyunda 1:0 hesablı qələbə qazanmışdı. Bu səbəbdən təmsilçimizə evdə istənilən hesablı qələbə və heç-heçə sərf edirdi. "Qarabağ" "Yanq Boyz" səddini keçdiyinə görə ardıcıl ikinci mövsümdə Avropa Liqasının qrupunda oynayacaq.
"Qarabağ"ın vitse-prezidenti Tahir Gözəl Ağdam klubunun İsveçrənin "Young Boys" klubunu məğlub edərək Avropa Liqasının final mərhələsinə çıxmasına münasibət bildirib.
Klubun yaxşı formalaşdığını bildirən T.Gözəl hazırda heç bir transfer gözlənilmədiyini diqqətə çatdırıb. O, AFFA prezidenti Rövnəq Abdullayevin futbolçulara vəd etdiyi mükafatdan əlavə, klubun onlar üçün nəzərdə tutduğu standart mükafatın olduğunu qeyd edib. "Ürəyi "Qarabağ"la döyünən hər kəsi təbrik edirəm. "Young Boys" klubundan üç il əvvəlki məğlubiyyətin revanşını götürdük", deyə Tahir Gözəl bildirib.
Premyer Liqanın bürünc mükafatçısı "Qəbələ" Yunanıstanda "Panatinaikos"un qonağı olub. "Qəbələ" - "Panatinaikos" oyunu 2:2 hesabı ilə başa çatıb. Beləliklə, Azərbaycan futbol tarixində "Qəbələ" üçüncü klubdur ki, Avro Liqanın qrup mərhələsinə vəsiqə qazanır.
"Qarabağ" adlı bir klubun bu cür möhtəşəm qələbəyə imza atmasının Azərbaycana nə kimi digər faydaları ola bilər?
İdman eksperti Ceyhun Məmmədov qəzetimizə açıqlamasında bildirdi ki, bu bir idman uğuru ilə yanaşı, həm də digər vacib sahəni əhətə edən qələbədir: "İdman nöqteyi-nəzərindən Azərbaycanın futbol tarixinə yazılacaq bir zəfərə imza atdıq. Komanda həm səfərdə, həm də doğma divarlar arasında gözəl oyun nümayiş etdirdi. Təbii ki, məhz Qarabağ adı ilə çıxış edən bir klubumuzun Avropa arenasında öz sözünü deməsi qürurvericidir. Siz fikir veribsiniz ki, bizim idmançılarımız üçün erməni rəqiblərilə qarşılaşmaq nə dərəcədə prinsipial əhəmiyyət kəsb edir? Bax, Qarabağ adı ilə çıxış etmək bizim üçün o dərəcədə əhəmiyyətlidir. Çünki ermənilər bu adın mənimsənilməsinə və ya unudulmasına çalışır. Hətta belə məlumatlar var ki, onlar xaricdə Qarabağ adı ilə domenlər yaratmağa cəhd edirlər.
Bizim azarkeşlərimiz Qarabağı fərqli bir coşqu ilə dəstəkləyir. Bunu sezmək o qədər də çətin deyil. Hətta Qarabağın xaricdə keçirdiyi oyunlara bilet alıb komandanı dəstəkləməyə gedən vətəndaşlarımızın sayında da bunu hiss etmək olur. Komandamızdan növbəti uğurları gözləyirik".
Məhəmmədəli QƏRİBLİ
