Ermənistan hakimiyyətində istefalar başlayıb. Erməni KİV-nin verdiyi məlumata görə, ölkənin Ədliyyə naziri və ən ali instansiya məhkəməsinin sədri bir-birinin ardınca istefa verib. Məlumata əsasən, istefa verdiyini bildirən nazir həmkarlarına da təşəkkür edərək bunları deyib: "Mən bu addımımdan məmnunam, mənim namizədliyimi Ədliyyə naziri postuna irəli sürdüyünə görə Ermənistan Baş naziri Nikol Paşinyana, birgə maraqlı, səmərəli və məsuliyyətli işə görə nazirlik əməkdaşlarına minnətdaram. Həmçinin xarici tərəfdaşlara, vətəndaş cəmiyyətinin nümayəndələrinə birgə fəaliyyətə görə minnətdarlığımı bildirirəm. Əminəm – yaxşı olacaq! Əgər yaxşı olmasa, onda çox yaxşı olacaq".
İstefa verən ali məhkəmə şurasının sədr Gevork Danilyan isə istefasının səbəbi barədə geniş danışmayacağını bəyan edib: “Mən bu bir ili çox gərgin atmosferdə və qrafiklə işlədim. Belə qərara gəldim ki, bundan sonra elmi fəaliyyətlə məşğul olsam yaxşıdır”. Ermənistanın hüquq sistemində baş qaldıran bu istefalar nəyin əlamətidir və bunu “məxməri inqlabın” əsas silahının artıq Paşinyanın özünə qarşı çevrildiyi kimi dəyərləndirmək olarmı?
Siyasi elmlər doktoru Hatəm Cabbarlı “Bakı-Xəbər”ə bildirdi ki, bu olduqca ciddi proseslərin start mərhələsi kimi dəyərləndirilə bilər: “Paşinyanın ötən ilin may ayında hakimiyyətə gəlməsindən sonra, Ermənistanın təxminən 30 illik müstəqillik tarixindən bu tərəfə yeni bir dönəm başladı. Bu dönəm qısa müddət ərzində Ermənistan ictimai rəyini Paşinyan istiqamətində cəmləşdirməyə xidmət etsə də, xüsusilə son aylar ərzində baş verən proseslərdən biz bunun tərsinin getdiyini görürük. Nikol Paşinyanın mövqeyinin zəifləməsində əsas rolu qondarma rejimlə Ermənistan hakimiyyəti arasındakı ziddiyyətlər oynayır. Yeni baş nazir bu müddət ərzində onsuz da ölkənin idarəetməsinə tam nəzarət edə bilmirdi. Sabiq prezident Köçəryanın həbsdən onun iradəsinə zidd olaraq buraxdırılmasından sonra ölkədə hakimiyyətin bir əldə cəmləşmədiyi daha aydın şəkildə özünü göstərdi. Bu, Paşinyan hakimiyyətinə güclü zərbə oldu. Həm də bəlli oldu ki, yeni baş nazir hüquq-məhkəmə sistemi üzərindəki nəzarətini tam bərpa edib qura bilməyib. Köçəryanın sonrakı açıqlamaları Paşinyanın manevr alanını bir qədər də məhdudlaşdırıb. Ermənistanda keçmiş hakimiyyət sayılan Qarabağ klanının fəallığının artması həm də göstərir ki, Paşinyan öz kabinetində belə mövqelərini itirməyə başlayır. Ədliyyə naziri və məhkəmə sədrlərinin istefa verməsi Paşinyan hakimiyyətinin zəiflədiyi, içdən söküldüyü mənasını daşıyır. Artıq hökumət nümayəndələri də görür ki, klanlar arasında gedən siyasi savaşda keçmiş hakimiyyət tərəfdarları üstünlük qazanır. Bunu dəyərləndirən adamlar indidən batan gəmini tərk edir. Uduzanın deyil, udanın yanında yer almağa çalışırlar. Önümüzdəki günlərdə bu istefaların arealının genişlənəcəyini görə bilərik. Yəni belə demək mümkünsə, Paşinyan hər gün təklənməyə doğru gedir. Paşinyanın bundan sonrakı dönəmdə necə siyasət həyata keçirəcəyindən asılı olmayaraq, ilin sonuna qədər hökumətdəki böhranın daha da dərinləşəcəyi gözlənilir”.
Məhəmmədəli QƏRİBLİ
