27/06/2019 17:07
728 x 90

Polşa prezidentinin bəyanatı hansı siyasi perspektiv vəd edir - Qarabağ münaqişəsinin həllində Azərbaycan həmişə bizim dəstəyimizə arxalana bilər...

Elman Nəsirov:“Polşa Prezididentinin bu mövqeyi bizim üçün çox əhəmiyyətlidir”

img

“Polşa dövlətinin rəhbəri tərəfindən münaqişənin tənzimlənməsi ilə bağlı Azərbaycanın ədalətli mövqeyinin dəstəklənməsi, heç şübhəsiz, münaqişənin tənzimlənməsi prosesində Azərbaycanın həm siyasi, həm də hüquqi baxımdan mövqelərini gücləndirən amildir”

“Bu həmçinin də Avropa İttifaqı ilə imzalanması planlaşdırılan sənədlə bağlı işlərin yekunlaşdırılmasında və Azərbaycanın bu məsələdə Polşa tərəfindən mövqeyinin müdafiə edilməsində yeni imkanlar açmış olur”

Dağlıq Qarabağ münaqişəsinin həll edilməsi üçün Azərbaycan dövlətinin haqlı mövqeyini dəstəkləyən dövlətlərin sırası genişlənir. Məlum olduğu kimi, Bakıda rəsmi səfərdə olan Polşa Prezidenti Andjey Duda da bu məsələdə Azərbaycanın hər zaman Polşanın dəstəyinə arxayın ola biləcəyini deyib. “Azərbaycan Dağlıq Qarabağ münaqişəsinin beynəlxalq hüququn normaları əsasında həllində hər zaman bizim dəstəyimizə arxalana bilər”- bəyanatı ilə çıxış edən Polşa Prezidenti Andjey Duda bildirib ki, bu problemin həlli istiqamətində Polşa Azərbaycana kömək edəcək:”Bu gün, cənab Prezident, Siz ərazi bütövlüyü məsələsinə toxundunuz və Dağlıq Qarabağ münaqişəsinin həlli ilə bağlı mövqeyinizi bildirdiniz. Bilirik ki, bu məsələ uzun illərdir həll olunmamış qalır. Hazırda biz BMT Təhlükəsizlik Şurasının qeyri-daimi üzvüyük. Biz bəyan etmək istəyirik ki, Azərbaycan bu münaqişənin beynəlxalq hüququn normaları əsasında həllində hər zaman bizim dəstəyimizə arxalana bilər. Biz bu problemin sülh yolu ilə həll olunmasında Sizə yardım edəcəyik. İstəyirik, arzumuzu bildirək ki, bu, belə də olsun. Biz istərdik ki, Minsk qrupu çərçivəsində aparılan danışıqlar bundan sonra da davam etsin və müsbət nəticələr gətirsin. Beləliklə, bu uzunmüddətli münaqişə öz həllini tapa bilər”.

Polşa Prezidentinin Azərbaycanla bağlı verdiyi dəstək bəyanatı ölkəmiz üçün nə deməkdir?

Millət vəkili, siyasi icmalçı Elman Nəsirov baki-xeber.com-a bildirdi ki, Polşa Prezidenti Azərbaycanda olarkən təkcə ikitərəfli əməkdaşlığımıza dair məsələləri deyil, xüsusilə də Ermənistan-Azərbaycan Dağlıq Qarabağ münaqişəsi və onun həlli ilə bağlı öz aydın, konkret mövqeyini ifadə etdi. “Bildirdi ki, Polşa dövləti bu münaqişənin tənizmlənməsi prosesində Azərbaycanın mövqeyini dəstəkləyir, bu mövqe də beynəlxalq hüquq norma və prinsiplərinə əsaslanır. Beynəlxalq hüquq norma və prinsiplərinə əsaslanmaq isə o deməkdir ki, münaqişə Azərbaycanın  ərazi bütövlüyü, sərhədlərinin toxunulmazlığı çərçivəsində öz həllini tapmalıdır. Çünki münaqişənin həlli ilə bağlı beynəlxalq təşkilatların, xüsusilə də BMT Təhlükəsizlik Şurasının məlum dörd qətnaməsində Avropa Şurasının Parlament Assambleyasının qəbul etdiyi bir sıra sənədlərdə, Avropa Parlametinin müvafiq sənədlərində, digər beynəlxalq təşkilatların qəbul etdiyi sənədlərdə məhz beynəlxalq hüququn ərazi bütövlüyü, sərhədlərin toxunulmazlığı və suverenlik prinsipləri öz əksini tapıb. Buna görə də hesab edirəm ki, Polşa Prezididentinin bu mövqeyi bizim üçün çox əhəmiyyətlidir. Çünki Polşa həm Avropa İttifaqı, eyni zamanda da NATO ölkəsidir. Yəni o həm dünyanın ən nəhəng hərbi siyasi təşkilatının, həm də bu gün dünyanın iqtisadi güc mərkəzlərindən biri olan, ümumdaxili məhsulun təxminən 25 faizini istehsal edən Avropa ittifaqının üzvüdür. Bilirsiz ki, Polşa dövlətinin Azərbaycanla tarixi ənənələr üzərində qurulan münasibətləri var, polşalı memarların Azərbaycanda tarixi xidmətləri olub. Polşa dövlətinin rəhbəri tərəfindən münaqişənin tənzimlənməsi ilə bağlı Azərbaycanın ədalətli mövqeyinin dəstəklənməsi, heç şübhəsiz, münaqişənin tənzimlənməsi prosesində Azərbaycanın həm siyasi, həm də hüquqi baxımdan mövqelərini gücləndirən amildir. Onu da nəzərə alsaq ki, Azərbaycan Avropa İttifaqı ilə strateji tərəfdaşlıq müqaviləsi üzərində iş aparır və onun yaxın perspektivdə imzalanması gözlənir. Bu baxımdan da hesab edirəm ki, Polşanın Azərbaycana olan bu isti münasibəti, münasibətlərimizin geniş spektrdə inkişaf etməsi, həm də bizim üçün fundamental əhəmiyyət kəsb edən məsələdə, Ermənistan-Azərbaycan Dağlıq Qarabağ münaqişənin tənzimlənməsində  mövqeyimizi dəstəkləməsi, heç şübhəsiz, əlaqələrimizin inkişaf səviyyəsinin ifadəsidir. Bayaq dediyim kimi, bu həmçinin də Avropa İttifaqı ilə imzalanması planlaşdırılan sənədlə bağlı işlərin yekunlaşdırılmasında və Azərbaycanın bu məsələdə Polşa tərəfindən mövqeyinin müdafiə edilməsində yeni imkanlar açmış olur”-deyə E.Nəsirov vurğuladı.

İradə SARIYEVA       

 

 

Son xəbərlər