Ermənistan hakimiyyətindəki böhran o qədər dərinləşib ki, hətta bir vaxtlar oğlu Aşotun güya cəbhə bölgəsində xidmət etməsi ilə öyünən baş nazir övladını yanına qaçırmağa məcbur olub.
Məlumata görə, Aşot Paşinyan Qarabağdan İrəvanın Nubaraşen rayonunda olan hərbi hissəyə köçürülüb. Məsələyə Ermənistan Müdafiə Nazirliyi də münasibət bildirib. Nazirliyin mətbuat katibi Artsrun Ovannisyan facebook səhifəsində yaydığı açıqlamada yenə Azərbaycanı ittiham edərək, dolayısı ilə həm Bakını yayılan xəbərlərin arxasında dayanmaqda ittiham edib, həm də özü də bilmədən yayılan şayiələri təsdiqləyib: “Mən Azərbaycan stilindəki məqalə başlıqlarını şərh etməyəcəyəm. Ermənistan silahlı qüvvələrinin istənilən hərbçisi müxtəlif vaxtlarda və müxtəlif yerlərdə toplanış, imtahan və hərbi təlimlərdə iştirak edə bilər”. Qeyd edək ki, Nubaraşendə 2017-ci ilə qədər Ermənistan silahlı qüvvələrinin V korpusu yerləşib. Sonradan bu korpus Rusiya-Ermənistan Birləşmiş Qoşunlarının tərkibinə verilib. İrəvanla Moskva arasındakı razılaşmaya əsasən, vahid ordu birləşməsinin tərkibinə Rusiyanın Ermənistandakı 102-ci hərbi bazası da daxil edilib. Qruplaşmaya Rusiya prezidentinin razılığı ilə Ermənistan dövlət başçısı komandan təyin edir. Hazırda komandan vəzifəsini Tiqran Pərvanyan icra edir. Sülh vaxtı qruplaşma Ermənistan ordusunun Baş Qərargahına, müharibə zamanı isə Rusiya ordusunun Baş Qərargahı və Cənub Hərbi Dairəsinə tabe olur. Qruplaşmanın rəhbərinin müharibə vaxtı kimə tabe olacağı haqqında qərarı isə Rusiya və Ermənistan prezidentləri müəyyənləşdirir. Paşinyan oğlunun əsgər getməsini o qədər siyasiləşdirmişdi ki, hətta Azərbaycan Prezidentinin oğlu ilə müqayisə də aparmışdı. Həmin vaxt İrəvanda çıxış edərkən N.Paşinyan bildirmişdi ki, guya Azərbaycanda ictimai fikrin hakimiyyət tərəfindən idarə olunmasına baxmayaraq, cəmiyyətdə belə bir sual var: necə olur ki, Ermənistanın baş nazirinin oğlu döyüş bölgəsinə əsgər gedir, lakin Azərbaycan prezidentinin oğlu guya Bakıda qulluq edir? Sitat:“Oğulun əsgər getməyi mühüm hadisədir. Lakin İlham Əliyevin oğlu Bakıda xidmət göstərir” O, öz oğlundan misal çəkib demişdi ki, iki ay əvvəl oğlu könüllü olaraq cəbhə xəttinə xidmət etməyə yollanıb. Həmin vaxt Azərbaycan prezidentinin Mətbuat katibi Azər Qasımov Paşinyana layiq olduğu cavabı vermişdi:”Paşinyanın növbəti sarsaq açıqlaması Prezident İlham Əliyevin oğlu Heydər Əliyevin Silahlı Qüvvələrdə xidməti ilə bağlıdır. Bildirmək istəyirik ki, Heydər Əliyev öz fiziki keyfiyyətlərinə və hazırlığına görə Azərbaycanın ən döyüş qabiliyyətli hərbi hissələrinin birinə hərbi xidmətə çağırılıb və sentyabrın 16-da keçirilən andiçmə mərasimi bu hərbi hissənin Azərbaycanın Silahlı Qüvvələrinin aparıcı hissələrinin biri olduğunu nümayiş etdirdi. Paşinyanın oğluna gəldikdə isə, bizdə olan məlumata görə, o, təmas xəttindən təxminən 50 km məsafədə Azərbaycanın işğal edilmiş Cəbrayıl rayonunda Ermənistanın hərbi hissələrinin birinə yazılıb və burada, əsasən, məişət məsələləri ilə məşğuldur. Bu hissəyə yazılmasına baxmayaraq, vaxtının çoxunu Xankəndidə keçirir. Ümumiyyətlə, Paşinyanın oğlunun hərbi xidməti ilə bağlı aparılan ucuz təbliğat növbəti populist və aşağı keyfiyyətli şoudan başqa bir şey deyil”. Ölkədəki vəziyyət bir balaca gərginləşən kimi oğlunu yanına qaçıran Paşinyanın Aşotla bağlı şou düzəltdiyi burdan açıq-aydın görünür. Ancaq ondan fərqli olaraq, İlham Əliyevin oğlu Heydər Əliyev hələ də öz xidmətini layaqətlə davam etdirir. Özü də hər an cəbhə bölgəsinə yollana biləcək bir hərbi hissədə. Paşinyanın bu addımına daha hansı qiyməti vermək olar?
Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, buna iki istiqamətdən yanaşmaq olar: “Hər ikisi də sübut edir ki, Paşinyan oğlu ilə də siyasi məqsədləri naminə yalan manipulyasiyalar edib. Özünü vətənpərvər, yeri gəlsə oğlunun canından belə keçməyə hazır olan şəxs kimi göstərməyə çalışıb. Bir sözlə, xalqın gözünə kül üfürüb. Bunun birinci səbəbi onun Qarabağ klanı ilə ciddi qarşıdurma yaşamasıdır. Bəllidir ki, Köçəryanın həbsdən zorla da olsa azad edilməsi Paşinyanın marionet bir ölkə rəhbəri olduğunu sübut etdi. Digər səbəb isə Ermənistan cəmiyyətində Azərbaycanın artıq savaşa başlamağa hazır olmasından doğan təşviş və narahatlıqdır. Ona görə Azərbaycan Ordusunun təlimlərindən öncə oğlunu təhlükəsiz yerə çıxarıb. Bu isə erməni rəhbərlərin bütün məsələlərə münasibətlərinin səmimi olmadığını, sadəcə populizmlə məşğul olmalarını, hətta maraqları xatirinə övladlarından, ailəsindən belə istifadə etmələrini göstərir. Bu fakt bir daha sübut edir ki, Ermənistandakı hakimiyyət nə etdiyini bilmir. Vəziyyətləri çox pisdi, hətta psixoz durumdadırlar. Hər nə olsaydı belə, o bəhanə ilə oğlunu yanına qaçırmamalıydı. Yəqin ki, opponentləri bundan Paşinyana qarşı ciddi kompromat kimi istifadə edəcək”.
Məhəmmədəli QƏRİBLİ
