Bakıya gələn gimnast ermənilər “Arsenal”dakı ermənilərin anti-Azərbaycan futbol oyunbazlığını ifşa etdi
Bakıda təşkil olunan Aerobika Gimnastikası üzrə Avropa çempionatında iştirak edən erməni əsilli rusiyalı gimnastlar yarışın təhlükəsizliyinin möhtəşəm səviyyədə təşkil olunması, yerli sakinlərin mehribanlığından və ünsiyyətcilliyindən razılıq edib.
Bu barədə erməni əsilli rusiyalı gimnastlar Qarsevan və Duxik Canazyanlar mediaya açıqlamalarında danışıb. Onlar Avropa çempionatında rahat şəraitin və idman atmosferinin olduğunu xatırladıb: “Bizi hər şey qane etdi”. Öz növbəsində, Duxik Canazyan Bakının gözəl şəhər olduğunu qeyd edib. O, xüsusilə müasir Bakı ilə paytaxtın qədim hissəsi olan İçərişəhər arasındakı kontrasta valeh olub. “Sanki başqa bir əsrə düşmüsən”, - deyə gimnast təəssüratlarını bölüşüb. Yerli sakinlərə gəlincə, gimnastların fikrinə görə, Bakı sakinləri ünsiyyətcil, gülərüz, mehriban və xeyirxahdırlar. “İdman idmandır. Siyasət isə siyasət”, - deyə Duxik Canazyan əlavə edib. İdmançıların bu açıqlaması sübut edir ki, Bakıda keçirilən beynəlxalq yarışlarda iştirak etməyi arzulayan istənilən erməni idmançıya təhlükəsizliklə bağlı zəmanət verilir. Bu, həmçinin, təhlükəsizliyi bəhanə edərək Avropa Liqasının Bakı finalında iştirak etməmək qərarına gələn Henrix Mxitaryana tutarlı cavab sayıla bilər. Eyni zamanda, ermənilər bununla həm “Arsenal” rəhbərliyini, həm də İngiltərə hökumətini aldada bildilər. Yəqin ki, göstərilən bu saxta şou sonda erməni futbolçunun öz başında çatlayacaq. Belə ehtimallar çoxdur ki, futboldan öz milli maraqları üçün saxta yollarla istifadə etmiş Mxitaryanla bağlı ciddi qərar qəbul edilə bilər. Bu sırada onun “Arsenal”dan qovulması və ya başqa kluba satılması müzakirə mövzusunun olacağı gözlənilir. Erməni əsilli gimnastların bu açıqlaması Mxitaryan üçün hansı mesaj sayıla bilər? İdman şərhçisi Ceyhun Məmmədov “Bakı-Xəbər” bildirdi ki, Mxitaryanın hərəkətlərinin sırf şou olduğu hamıya bəlliydi: “Onunla bağlı aparılan araşdırmalar göstərir ki, idmançı futboldan çox siyasətə meyllidir. Özü də ifrat milliyyətçiliklə zəhərlənmiş həmin futbolçu separatizmə meylliliyi, işğala haqq qazandıran addımları ilə də yadda qalıb. Mxitaryan bir vaxtlar Bakının icazəsi olmadan Azərbaycanın işğal altında olan ərazisinə səfər edib. Lakin yenə də onun Bakıdakı təhlükəsizliyinə təminat verildi. Bununla Azərbaycan göstərdi ki, siyasəti idmanla qarşıdırmaq istəmir. Təəssüf ki, “Arsenal” klubu və İngiltərənin rəsmi dairələri ermənilərin təsirinə düşüb Mxitaryanla həmrəy oldular. Yadınızdadırsa, bu mövzu yeni müzakirə ediləndə “Arsenal”ın məşqçisi bildirdi ki, ermənilərlə bizim aramızda olan münaqişədən xəbərsizdir. Görünür, sonra saxta təbliğatla onları Mxitaryanı güya təhlükə gözlədiyinə inandıra bildilər. Amma sonrakı araşdırmalar göstərdi ki, ermənilər sadəcə “Arsenal”ı öz siyasi oyunlarına alət etməyi bacardılar. Bu günlər ərzində həm onların, həm də futbolun keçirilməsinə məsul olan qurumların diqqətinə çoxlu sayda faktlar çatdırıldı. Qeyd edildi ki, indiyə qədər Bakıda keçirilən bir çox tədbirlərdə erməni əsilli idmançılar iştirak edib. Hətta Ermənistanın özünü belə təmsil edən idmançılar burda olub, fəxri kürsünün ən yuxarısına qalxanları da olub. Onların heç biri ilə bağlı problem yaşanmayıb. Erməni əsilli gimnastların açıqlaması isə məsələyə birdəfəlik nöqtə qoydu. Yəqin ki, bundan sonra “Arsenal” Mxitaryanı necə başından edəcəyi barədə düşünəcək. Çünki o, futbol oynamaq əvəzinə, siyasi şoular göstərməklə məşğuldur. O bir oyunçu kimi də “arsenal” üçün məhsuldar deyil, əsasən ehtiyat skamyasında oturur. Yəqin ki, klub üçün ən optimal variant ondan uzaqlaşmaq olacaq”
Məhəmmədəli QƏRİBLİ
