Nahid Bağırov: “Bu qiymətlər turistlər üçün əlverişli olmayacaq”
Məlum olduğu kimi, "Dövlət rüsumu haqqında" Qanunda dəyişiklik edilir. Qanunun 16.1.7-ci maddəsinə görə, çoxdəfəlik giriş vizalarının rəsmiləşdirilməsi üçün dövlət rüsumu 350 ABŞ dolları məbləğində müəyyən edilib. Ancaq bu dəyişiklik cəmiyyətdə birmənalı qarşılanmayıb. Belə ki, bunun turist axınına mənfi təsir edəcəyi barədə fikirlər səslənir. Turizm Assosiasiyasının (AzTA) rəhbəri Nahid Bağırov hesab edir ki, bu qiymətlər turistlər üçün əlverişli olmayacaq: “Təyin edilən 350 dollarlıq viza qiymətləri iş adamları və ya başqa səbəblərdən dolayı gələn qeyri-turistlər üçün normal ola bilər. Amma bunu ölkəyə gələn turistlərə şamil etmək olmaz. Turist bir aydan çox Azərbaycanda qalmaq istəyirsə, yaxud ölkəyə daxil olub, başqa bir ölkəyə gedib yenidən Azərbaycana gəlmək istəyirsə, bu qiymət, sözsüz ki, bahadır”.
Turizm sahəsi üzrə ekspert Elçin Rüstəmov da düşünür ki, Azərbaycana çoxdəfəlik giriş vizalarının rəsmiləşdirilməsi üçün dövlət rüsumunun 350 ABŞ dolları məbləğində müəyyənləşdirilməsi çoxdur: “Əslində, 350 dollar viza üçün kifayət qədər böyük məbləğdir. Bir tərəfdən baxanda, bu, turizm sahəsinə - ölkəyə turistlərin gəlişinə mənfi təsir göstərə bilər. Amma bir məqam da var ki, bəzən vizaların sərtləşdirilməsi və ya qiymətinin artırılması təhlükəsizlik məqsədilə tətbiq edilir. Əksər ölkələrdə də bu, təhlükəsizlik məqsədilə tətbiq edilib. Hazırda bizdə bu addım hansı məqsədlə atılıb, onu dəqiq deyə bilmərəm, bu sadəcə variantlardır. Amma ölkəyə turist cəlb etmək istəyiriksə, bunun uğurlu olacağını düşünmürəm”.
Günel CƏLİLOVA
