Ermənistan parlamentinin spikeri Ara Babloyan Baş nazir Nikol Paşinyanın hakimiyyətinin 100 günü ilə bağlı keçirdiyi mitinqin ardından bəyanat yayıb.
Məyusluq notları ilə kifayət qədər zəngin olan bəyanatda spiker Baş nazirin idarəetmə proqramını hərtərəfli təhlil edərək bildirir ki, bütün erməni xalqı kimi, bu proqramın həyata keçməsilə ölkədə çox böyük dəyişikliklərin baş verəcəyini, həyat səviyyəsinin yüksələcəyini və əlbəttə, demokratik quruluşun bərqərar olacağını gözləyirdi, lakin bu 100 gün ərzində yaşananlar deyilənlərin hələ ki arzu olaraq qalacağını göstərir. Babloyanın göstərilən müddətin bəlkə də bu proqramın həyata keçirilməsi üçün az olduğunu deməklə əslində ölkədə yaşanan məyusluğu ört-basdır etdiyi, yoxsa Paşinyanla münasibətinin pozulmaması üçün fikirlərinə “ayaq yeri” qoyduğu bəlli deyil. Amma görünən odur ki, erməni parlamentinin spikeri bu məyusluğu göstərmək üçün ciddi əsaslara malikdir. Məsələn, o deyir ki, bu 100 gün ərzində hökumətin fəaliyyətini diqqətlə izləyib və parlament spikeri olaraq, Paşinyanın ölkənin təhlükəsizliyini, iqtisadi cəhətdən inkişafını, həyat səviyyəsinin yüksəlməsini və əlbəttə ki, demokratiyanın bərqərar olmasını hədəfləyən proqram həyata keçirəcəyini umub, lakin bunların hansınınsa həyata keçəcəyinə işarə edən situasiyanın şahidi olmayıb. Özü-özlüyündə bu çox ciddi ittihamdır, üstəlik, bu ittihamı sıradan birinin deyil, parlament spikerinin dilə gətirməsi düşmən ölkədə çox ciddi təlatümlərin baş qaldırdığından xəbər verir. Diqqət edin, Babloyan deyir ki, korrupsiya ilə mübarizə yaxşı haldır, lakin Ermənistanda hakimiyyət xalqa məxsus olduğundan, idarəetmədə xalqın səsinə qulaq verilməli, alınan qərarlar xalqa açıqlanmalı, eyni zamanda ölkə Konstitusiyasının və beynəlxalq öhdəliklərin tələbləri yerinə yetirilməlidir. Bu isə o deməkdir ki, Paşinyan hökuməti artıq Konstitusiyaya və beynəlxalq öhdəliklərə əməl etmir, xalqın çiynində hakimiyyətə gəlsə də, onun mənafeyini qorumur. Bütün bunlara diqqət çəkən Babloyan baş verənlərdən ciddi şəkildə narahat olduğunu açıq mətnlə dilə gətirir, bildirir ki, bu gün ölkədə ictimai-siyasi vəziyyət, dövlət orqanlarının konstitusion-hüquqi münasibətləri və vətəndaş həmrəyliyi ciddi təhdid altındadır.
Babloyanın sözlərinə görə, narahatlığı Paşinyanın 100 günlük mitinqindəki nitqindən sonra bir qədər də dərinləşib. Belə ki, Paşinyan həmin nitqində hər kəsi danışmadan öncə düşünməyə çağırıb və deyib ki, düşünmədən danışmayın, sonra da deməyin ki, bizdə söz azadlığı məhdudlaşdırılır. Baş nazirin “Öncə danışmazdan əvvəl düşünməyi öyrənin, sonra söz azadlığı barədə fikirləşin” sözlərini sitat gətirən spiker deyib ki, bu, birbaşa müxalif düşüncəyə təzyiqdir və qəbulolunmazdır, çünki Paşinyan ilk növbədə ölkəyə demokratiya vədilə bu kürsüyə gəlib, demokratiyanın əsas göstəricisi isə məhz söz və ifadə azadlığıdır. Spiker onu da bildirir ki, buna paralel olaraq, Milli Təhlükəsizlik Xidməti hakimlərə və parlamentdəki opponentlərə təzyiq yolu tutub ki, bu da demokratik düşüncənin ən kiçik işartısına belə ümid yeri qoymur.
Babloyanın sözlərinə görə, bu deyilənlərdən əlavə, Nikol Paşinyanın çıxışında xüsusilə konstitusiya quruluşu, dövlətin əsasları üçün ciddi təhlükə sayılacaq fikirlər vardı ki, bunlar da ölkədə hüquqi və demokratik dövlət quruculuğu üzrə beynəlxalq öhdəliklərə daban-dabana ziddir. Özəlliklə o, Baş nazirin hakimlərə “ağlınızı başınıza yığın” çağırışını hakimiyyətin məhkəmə qolunun müstəqilliyinə çox ciddi təhdid adlandırıb, Baş nazirin dilindən səslənən “ədalət məhkəməsinin keçid dövrü” tezisini isə “qanunlara geriyə dönüş qüvvəsinin verilməsinə işarə” olaraq qəbul etdiyini bildirib.
Spikerin sözlərinə görə, hakimiyyətin parlament yolu ilə ölkədə konstitusion islahatlar keçirmək, hətta təhdidlə, nəyin bahasına olursa-olsun istənilən nəticəyə nail olmaq niyyəti də qanunverici orqana təzyiqdən başqa bir şey deyil.
Bütün bunlar əslində müzakirələrlə yoluna qoyula biləcəyi halda təzyiq mexanizmlərinin işə salınmasını anlamadığını deyən Babloyan sonda bildirir ki, bu səbəbdən Prezident, baş nazir, Ombudsman, Ali Məhkəmə Şurasının rəhbəri və beynəlxalq diplomatik missiyaların rəhbərlərilə görüşüb situasiyanı ciddi şəkildə müzakirə etmək niyyətindədir.
Beləliklə, baş verənlər Ermənistanda yaxın zamanlarda ciddi təlatümlərin yaşanacağından xəbər verir. Eyni zamanda, sələflərindən fərqli olaraq hakimiyyətə qan tökmədən gələn, bununla da demokratik imic qazanan Paşinyanın cəmi 100 günə bu imici sürətlə itirdiyi, əvəzində ölkəsinə 101 məyusluq yaşatdığı ortadadır.
SAMİRƏ
