Hakimiyyətinin 100 günü münasibətilə mitinq keçirən Ermənistanın Baş naziri Nikol Paşinyan müxalifətin kəskin reaksiyası ilə üz-üzə qalıb.
Kommersant.ru-nun xəbərinə görə, müxaliflər Paşinyanın Rusiya ilə yeni münasibətlər sistemi qurmasına sərt təpki verib və onu Moskva ilə dialoqda “səs tonuna fikir verməyə” çağırıb. Sayt yazır ki, mitinqdə Paşinyan özünə inamlı görünsə də, əslində onun hakimiyyətdəki dayaqları möhkəm deyil. Erməni politoloqu Aleq Qalstyan sayta açıqlamasında deyib ki, Baş nazirin “əsas siyasi kapitalı” və opponentlərinə təzyiq vasitəsi küçə yürüşləri olaraq qalır, önəmli postlar isə hələ də Respublika partiyasının nəzarətindədir.
Qloballaşma və regionda əməkdaşlıq üzrə İrəvan Analitik Mərkəzinin direktoru Stepan Qriqoryan isə deyib ki, Paşinyan özü ilə hakimiyyətə yalnız bir neçə gənc və təcrübəsiz nazir gətirib, qalanları köhnə kadrlardır. “Bu halda Paşinyan öz ideyalarını necə həyata keçirəcək” deyə sual edən politoloq, üstəlik, Baş nazirin başçılıq etdiyi “Yelk” fraksiyasının parlamentdə azlıq təşkil etməsinə diqqət çəkərək, bu vəziyyətdə onun yeni qanunlar qəbul edilməsində, beləliklə də verdiyi vədlərin yerinə yetirilməsində ciddi çətinliklər yaşayacağını bildirir. Belə olan təqdirdə isə, hətta tərəfdaşları belə, Paşinyanın çox tezliklə ciddi reytinq itkisi yaşamasını istisna etmir.
Bu arada eks-prezident Robert Köçəryan aktiv siyasətə qayıtdığının anonsunu verib. Yerli “Yerkir Media” telekanalına müsahibəsində o deyib ki, hesab edin, artıq mən siyasətə qayıtmışam. Gəlişinin səbəbini isə o, hazırkı hakimiyyətin yeni siyasi xəttilə izah edib. Bildirib ki, Paşinyanın bütün dünyanın Ermənistandakı yeni vəziyyətə adaptasiya olunmalı olduğu barədə bəyanatı onu ciddi narahat edib. “Bu sözlər Rusiyaya da aiddir, lakin Rusiya onunla bu dildə danışılacaq dövlət deyil”- eks-prezident bildirib. Həmçinin onu da deyib ki, Moskvanın strateji partnyorluğu olmadan Ermənistanın təhlükəsizliyi təhdid altındadır.
Xatırladaq ki, “Yerkir Media” millətçi “Daşnaksütyun” partiyasına aiddir ki, bu partiya parlamentdə 105 səslə təmsil olunur. 2008-ci il hadisələrindən sonra “siyasi meyit”ə çevrilən Köçəryanın Paşinyan hakimiyyəti tərəfindən təqib və həbs olunmasından çox keçmədən onun məhkəmənin qərarı ilə həbsdən buraxılması, bunun dərhal ardından bu telekanala müsahibə verərək gurultulu “qayıtdım” bəyanatı səsləndirməsi Ermənistan siyasi arenasında çox böyük təlatümlərin anonsu sayıla bilər. Stepan Qriqoryan onu da deyib ki, Köçəryan ölkədə çox böyük maddi, inzibati və informasiya resurslarına malikdir və son iki həftədə çox sayda ekspert və jurnalist onun müdafiəsi yönündə çıxışlar edir ki, bu da eks-prezidentin məhz ictimaiyyətin dəstəyilə ölkədə yaxın zamanlarda çox böyük siyasi hərəkat başlada biləcəyindən xəbər verir.
SAMİRƏ
