“Hazırda lirənin məzənnəsində kəskin ucuzlaşma yaşanır, bu hal ölkəmizdə türk mallarının satışında özünü göstərməlidir”
Məlum olduğu kimi, ötən həftə Türkiyənin milli valyutası kəskin dəyər itirib. Belə ki, türk lirəsi dollar qarşısında 17 faizə yaxın ucuzlaşıb. Lirənin ucuzlaşması Türkiyədə istehsal olunan malların dollarla müqayisədə kəskin ucuzlaşmasına səbəb olub. Bu səbəbdən də bəzi ticarətçilər Türkiyəyə üz tutur ki, ordan geyim və digər məhsulları alıb Bakıda bazara çıxarsın.
Lakin maraqlıdır ki, buna rəğmən, türk mallarının satışı ilə məşğul olan dükan və yarmarkada Türkiyə istehsallı tekstil malların qiymətində nəzərəçarpacaq endirimlər yoxdur. Satıcıların bildirdiyinə görə, artıq neçə ildir Türkiyədən tekstil malları gətirilməsi çətinləşib. Buna görə də, lirə ucuzlaşsa belə, ciddi endirim gözləmək lazım deyil, tekstil malları ucuzlaşmayacaq.
Maraqlıdır, hazırda Azərbaycanda türk mallarının alışında hansı dəyişiklik baş verib?
Məsələ ilə bağlı fikir bildirən iqtisadçı ekspert Fuad İbrahimov da “Bakı-Xəbər”ə açıqlamasında təsdiqlədi ki, Azərbaycanda türk mallarının satışında hər hansı bir dəyişiklik yoxdur: “Bəzi məhsullar var ki, onların Türkiyədə istehsalında idxal amilinin çəkisi yüksəkdirsə, mütləq qiymətdə fərq hiss olunacaq. Istehsal prosesində idxal amili az olarsa, o zaman qiymətlərdə əhəmiyyətli dərəcədə fərq olmayacaq. Bu hazırda Türkiyə bazarında da müşahidə olunur”.
Həmsöhbətimiz onu da vurğuladı ki, idxal olunan məhsullar geri qayıdan zaman sərmayə dönərli valyuta şəklində geri qayıtmalıdır: “Onu da nəzərə almaq lazımdır ki, hazırda lirənin məzənnəsində kəskin ucuzlaşma yaşanır. Bu hal ölkəmizdə türk mallarının satışında özünü göstərməlidir”.
İqtisadçının sözlərinə görə, hazırda alış-veriş məqsədilə Türkiyəyə getmək istəyənlərin sayı artıb: “Yerli turistlərə 10-15 gün ərzində səyyahətlərini həyata keçirmələri məsləhətdir. Çünkü bu müddətdən sonra Türkiyədə yerli məhsulların və xidmətlərin bahalaşacağı gözlənir”.
Günel CƏLİLOVA
