Son günlər erməni-kürd əsilli rusiyalı müğənni Zara Mqoyanın 26-29 iyul tarixində Bakıda keçiriləcək “Jara-2018” Beynəlxalq Musiqi Festivalına qatılacağı xəbərləri sosial şəbəkələrdə əsas müzakirə mövzusuna çevrilib və əksəriyyət onun Azərbaycana gəlişinə etiraz edir.
Əslində bu etirazçı zümrəni arqumentsiz saymaq da olmaz və xalqımızın tarix boyu ermənilərdən çəkdikləri nəzərə alınarsa, hardasa bu mövqeyi təqdir də etmək olar. Amma gəlin görək, bu inkarçı mövqe bizə nə verəcək?
Bəlli məsələdir ki, Azərbaycan hər nə qədər təcavüzə məruz qalan və bu üzdən də haqlı tərəf olsa da, Qarabağ münaqişəsinin dinc yolla tənzimlənməsi üçün əlindən gələn hər şeyi edir və qansız-qadasız nəticə əldə olunması yönündə sonsuz təmkin nümayiş etdirir. İllərlə bu istiqamətdə aparılan yüksək səviyyəli danışıqların əsas tezisləri sırasında isə Qarabağın erməni icmasının torpaqlar qaytarıldıqdan sonra da Azərbaycan dövlətinin təminatı altında özlərinin buradakı ata-baba yurdlarında dinc və qorxusuz şəkildə yaşaya biləcəyi bəndi də yer alır ki, məhz bu bənd də tolerantlığın və humanizmin Azərbaycanın dövlət siyasətinin əsas tərkib hissələrindən birini təşkil etdiyini göstərir. Bu halda biz indi bir erməni əsilli müğənninin mədəni bir tədbirə qatılmaq məqsədilə ölkəmizə gəlişinə qarşı bu qədər sərt mövqe ortaya qoysaq, dünya necə inana bilər ki, sabah Dağlıq Qarabağ Azərbaycana qaytarılarsa, biz ermənilərlə birgə yaşaya, onların təhlükəsizliyini təmin edə bilərik? Üstəlik, onun erməni deyil, yezidi kürdü olduğu deyilir və biz bu sadə sənət adamını yalnız Ermənistanda doğulduğu üçün düşmən elan edib ölkəmizə girişini yasaqlamaqla onu deyil, əslində özümüzü pis vəziyyətdə qoymuş olarıq. Xatırlayırsınızsa, aylar öncə AŞPA xəttilə də erməni deputatlar Bakıya gəlmiş və bu gəlişə qarşı kəskin etirazlar səslənmişdi. Nəticə kimin xeyrinə oldu? Təbii ki Azərbaycanın. Çünki həm dünya təcavüzkarın və sülh tərəfdarının kim olduğunu bir daha anladı, həm də gələn ermənilər, ölkələrinə rəğmən, Azərbaycanın necə böyük inkişaf yolu keçdiyinin şahidi oldu.
Bu gün Azərbaycan bütün dünyada müxtəlif xalqların sülh və qarşılıqlı anlaşma şəraitində yaşadığı, tolerant, bütün dini və milli azadlıqların təmin edildiyi ölkə imicinə malikdir və gəlin, bu imicə ləkə düşməsinə yol verməyək. Bütün dünyaya sübut edək ki, Azərbaycan xalqı ermənilərlə dinc yanaşı yaşamağa hazırdır. Yetər ki, Azərbaycan torpaqları geri qaytarılsın və Azərbaycanın ərazi bütövlüyü bərpa edilsin.
O da var ki, sənət adamlarını siyasi çəkişmələr qəti şəkildə maraqlandırmır, onları maraqlandıran səviyyəli mədəni tədbirlərin təşkil olunmasıdır ki, Azərbaycanın bu mənada da Ermənistandan üstün olmasını onların öz gözlərilə görməsi də bizim uğurumuzdur. Qoy gəlib oxusunlar...
Baki-xeber.com
