NATO-nun və AB-nin sammit qərarlarından və Prezident Ilham Əliyevin uğurlu Paris səfərindən sonra Ermənistan rəhbərliyinin ritorikasında adekvat olmayan aşkar ziddiyyətlər görünməkdədir. Bunu Baki-xeber.com- a açıqlamasında Aydın Quliyev deyib.
A.Quliyev bildirib ki, ''İyulun 20-də Ermənistanın Baş naziri Paşinyanın mətbuat konfransında söylədiyi fikirlər və iddialar, yəqin ki, beynəlxalq dairələrin də təəccübünə səbəb olacaq. Paşinyan bütün cəbhələrdə müharibə prinsipini sondakıları düşünmədən hərəkətə gətirib. Əminəm ki, Ermənistandakı ağıllı adamlar Baş nazirin son çıxışının şokundan uzun zaman cıxmağa çalışacaqlar. Paşinyan həm Ilham Əliyevin Fransadakı uğurlarından doğan qəzəbini büruzə verir: həm Avropa Birliyi ilə NATO-nun ərazi bütövlüyü prinsipini dəstəkləməsindən məmnun qalmadığını göstərir, həm də Avropadan istədiyi maliyyə yardımını ala bilməməsinin heyfini çıxır. Ən diqqətçəkən məsələ odur ki, Paşinyan Qarabağ probleminin həllinə hazırkı baxışları ilə həm Rusiyanın, həm də Avropa Birliyinin aydın mövqeyinə qarşı təpki verir. Paşinyan siyasi məntiqi və geosiyasi qütblər arasında balansı dövlət başçılarına xarakterik olmayan tərzdə itirməkdədir. Baş nazirin Qarabağ üzrə sıra ilə üç şərt irəlu sürməsi hazırkı şəraitdə təxminən hamıya qarşı müharibə aparmağa oxşayir. Paşinyan Qarabag probleminin həlli üçün qanunsuz rejimin danışıqlarda iştirakı, Azərbaycanın öz kompromislərini elan etməsi və qarşılıqlı etimada Azərbaycanın təminat verməsi kimi absurd şərtlər irəli sürüb. Üstəlik, bu şərtləri elə bir vaxtda ortaya qoyub ki, Avropa komissari Mogerini və Rusiya rəsmiləri ilkin şərtlərsiz danışıqlara başlamağı labud hesab edib. Danışıqlar formatının dəyişdirilməsi cəhdlərinin ziyanlı olduğunu beynəlxalq vasitəçilər çox dəqiq ifadə etdikləri, hətta bu şəxsən Paşinyanın özünə deyildiyi halda, yenidən qondarma “DQR”-i danışıqlara gətirmək barədə bəyanat mahiyyətli danışıqlara olan-qalan son ümidləri də məhv edir. Azərbaycanın kompromisləri və qarşılıqlı etimada təminat verməsi şərtinə gəldikdə isə, bu açıq-aşkar müharibə situasiyasını sürətləndirmək cəhdidir. Paşinyan anlamaya bilməz ki, bu şərtlərin heç biri Azərbaycan tərəfindən qəbul edilə bilməz. Ancaq Ermənistan rəhbəri buna gedir və fikrimizcə, bunu məqsədyönlü olaraq edir. Elə həmin mətbuat konfransında Paşinyanın Ermənistanda Rusiya hərbi bazası və regionda sülh üçün Rusiyanın məsuliyyəti barədə dediklərini xatırlamaq lazım gəlir. Rusiya bazasının haqq ödəmədən mövcudluğuna qarşı işarələr vuran Paşinyan ardınca deyir ki, regionda sülh üçün super dövlət olaraq Rusiyanın məsuliyyəti var, Rusiya müharibənin qarşısını almaq imkanlarına malikdir və inanmıram ki, Azərbaycan müharibəyə basladiği halda, Rusiya bunun qarşısını almaq üçün öz imkanlarından istifadə etməsin. Bunlar Pşinyanın mətbuat konfransında dedikləridir. Paşinyanin bütün region üçün təhlükəli bir oyuna start verdiyi göz qabağındadır. Azərbaycana müharibədən başqa yolu olmayan bir vəziyyət yaradir, ardınca isə pozula biləcək regional sülh üçün bütün məsuliyyəti Rusiyanın üstünə atır. Paşinyanın məntiqi sxemi budur: Regionda mümkün müharibənin birbaşa səbəbkarı Azərbaycan, dolayı müqəssiri isə Rusiyadir". Rusiya, Avropa Birliyi Paşinyanın qorxulu müharibə sxemini mümkün qədər tezliklə durdurmasa, regionumuzda sonu görünməyən müharibə başlaya bilər.
Beləliklə, Paşinyan regionumuzda muharibə maraği olan beynəlxalq qüvvələrin əlinə oynayır.
