Gəncədə iyulun 10-da iki yüksək rütbəli polis məmurunun qətlə yetirilməsi bu yaxınlarda şəhər İcra Hakimiyyətinin başçısı Elmar Vəliyevə sui-qəsd cəhdinin arxasında radikal dini qrupların dayanması barədə səslənən versiyaların həqiqətə uyğun olduğunu bir daha təsdiqləmiş oldu.
Xatırladaq ki, 2015-ci ildə Bakının Nardaran qəsəbəsində başıpozuq dindar dəstəsinə qarşı hüquq-mühafizə orqanlarının əməliyyat keçirməsi və kütləvi həbslərin baş verməsinə dərhal Gəncədən əks-səda gəlmiş, dini məzmunda bəyanatlar səslənmişdi. Şəhər İcra Hakimiyyətinin baçısı Elmar Vəliyev həmin il dekabrın 3-də bir qrup dindarın respublikada ictimai-siyasi sabitliyi pozmaq, təxribatlar, kütləvi iğtişaşlar və terror aktları törətmək , bütövlükdə konstitusiya quruluşunu dəyişdirməyə yönəldilən hərəkətlərinə münasibət bildirilməsi ilə əlaqədar Gəncədə keçirilən ictimaiyyətin toplantısında bildirmişdi ki, əslində Nardaranda noyabrın 26-da başlayan iğtişaşlara hazırlıq Gəncədə hələ bir müddət əvvəl start götürüb. Belə ki, oktyabrın 23-də Gəncənin Cümə məscidinə toplaşan bir qrup dindar asayişi pozaraq, dini ayin keçirmək adı altında ekstremist hərəkətlər edib, nəticədə hüquq-mühafizə orqanları tərəfindən həbs olunanlar olub.
“İnsanlara qarşı hörmətsizlik, hətta döymək, polisi vurmaq cəhdləri oldu. Sözsüz ki, bunların qarşısı alındı və 82 nəfər həbs olundu. Yerdə qalanlar qaçdılar və sonradan onların hamısı məsuliyyətə cəlb olundu. Bütün bunlar bizdə çox böyük təəssüf doğurur” - deyə Gəncə şəhər İcra Hakimiyyətinin başçısı Elmar Vəliyev bildirmişdi.
Bu gün Gəncədə yüksək rütbəli polis məmurlarının qəddarcasına qətlə yetirilməsi və sosial şəbəkələrdə bir sıra azğın tör-töküntünün hadisə yerindən şəkillər paylaşaraq “polislər belə öldürülməlidir” kimi anormal çağırışlar etməsi isə gəldiyimiz qənaəti bir qədər də gücləndirir. Baş verənləri araşdırdıqda aydın görünür ki, Gəncənin polis orqanları baş qaldıran etirazların səngiməsi və şəhərdə asayışın bərpa olunması üçün maksimum səy göstərib. Belə olmasaydı, yüksək rütbəli məmurlar öz həyatları bahasına qızmış kütlənin qarşısına çıxıb onları danışıqlara sövq etməyə çalışmaz, ən pis halda hadisənin qurbanı sıravi polis nəfərləri olardı. Mediada yaylan xəbərlərdə də deyilir ki, qətlə yetirilənlər – Gəncə şəhər Baş Polis İdarəsinin rəis müavini, polkovnik İlqar Balakişiyev və Gəncənin Nizami rayonunun Polis İdarəsinin rəis müavini, polkovnik-leytenant Səməd Abbasov şəhərdə qanunsuz aksiyanın önünü almaq üçün toplaşmış kütlə ilə danışıqlara gedib. Lakin bu zaman aqressiv şəxslərin hücumuna məruz qalaraq soyuq silahla qətlə yetiriliblər.
Qeyd edək ki, polkovnik-leytenant Səməd Abbasov “İmamzadə” məscidinin axundu Hacı Tahirin qardaşıdır.
SAMİRƏ
