Ermənistanda Manvel Qriqoryanla bağlı korrupsiya qalmaqalı bitməmiş İrəvan meri Taron Markaryan özünün ağılalmaz əmlakı ilə gündəmi zəbt edib.
Baki-xeber.com-un erməni mətbuatına istinadən xəbərinə görə, bu vəziyyət FACT TV (First AntiCorruption TV)-nin onun barəsində efirə verdiyi videonun ardından başlanıb. Belə ki, “Taron Markaryan: ətrafı, malikanələri və milyonları” adlı videosüjetdə İrəvan merinin özünün və anasının adına rəsmiləşdirilmiş əmlakı nümayiş etdirilib. Həmin axşamın ertəsi gün Ağsaqqallar Şurasının iclasına sədrlik etməli olan Markaryan toplantıya ümumiyyətlə qatılmayıb. Erməni mətbuatı videosüjet səbəbindən onun halının pisləşdiyini güman edir. Çünki sadalanan faktlar onun nəinki özünün, hətta anasının barəsində cinayət işi qaldırılmasına bəs edir. Bu əmlakların dəyəri isə milyonlarla ölçülür və bu hələ onun əmlakının yalnız bir hissəsidir.
Mətbuatın xəbərinə görə, vaxtilə Erməni Milli Konqresi Xüsusi İstintaq xidmətinə Taron Markaryanın əmlakının qanuni olub-olmaması ilə bağlı sorğu göndərib. O zaman dövriyyəyə belə şayiələr buraxılıb ki, guya Tarona bu əmlak atasından – eks Baş nazir Andranik Markaryandan miras qalıb. Lakin bu addım da uğurlu olmayıb, çünki bu halda onun atasının bu əmlakı hansı yolla əldə etdiyi sualı ortaya çıxıb və Taron həmin versiyanı inkar etməyə məcbur olub. Lakin yenə də onun sözügedən əmlakı hansı yolla əldə etdiyi sualı açıq qalıb və kiçik Markaryan əmlakını heç bir deklarasiyada göstərməməkdə davam edib. Üstəlik, yaratdığı “İrəvan” fondunu ləğv etməklə korrupsiya əməllərini ört-basdır eləməyə cəhd edib, lakin alınmayıb.
Erməni mətbuatı yazır ki, Ağsaqqallar Şurasının Respublika partiyasından olan üzvləri, Qriqoryanla olduğu kimi, indi də Markaryandan - onlara dövlət əmlakını talamaq fürsəti vermiş şəxsdən uzaq durmaqla özlərini qorumağa çalışır.
