Elçin Mirzəbəyli: "Qənaətimcə, bu çox önəmli bir təklifdir və o üzdən bunu birmənalı şəkildə dəstəkləyirəm" Akif Aşırlı: "Nuru paşa ilə bağlı müsabiqə təklifi mütərəqqi haldır"
Xəbər verildiyi kimi, fevralın 9-da Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli fondun ofisində Türkiyənin ölkəmizdəki fövqəladə və səlahiyyətli səfiri Erkan Özoral və səfirliyin mətbuat müşaviri Həmid Karadenizlə görüşüb. Görüşdə bir sıra məsələlər müzakirə olunub.
Beynəlxalq təcrübənin öyrənilməsi məqsədilə reallaşdırılan layihələr barədə məlumat verən V.Səfərli fondun Türkiyə və digər türkdilli dövlətlərin media qurumları arasında əməkdaşlığın genişləndirilməsində maraqlı olduğunu qeyd edib.
Türkiyənin Azərbaycandakı fövqəladə və səlahiyyətli səfiri E.Özoral fondla əməkdaşlığa xüsusi önəm verdiyini bildirərək, Bakı şəhərinin Nuru paşanın rəhbərlik etdiyi türk ordusunun köməyilə bolşevik-daşnak qruplaşmasından azad olunmasının 100-cü ildönümü ilə əlaqədar fondla birgə müsabiqənin keçirilməsini təklif edib.
Fondun icraçı direktoru V.Səfərli təklifi yüksək dəyərləndirərək Türkiyə və Azərbaycan mediasının qarşılıqlı faydalı əməkdaşlığının genişləndirilməsindəki roluna görə səfirə təşəkkürünü bildirib.
Görüşdə qarşılıqlı maraq doğuran digər mövzular ətrafında da fikir mübadiləsi aparılıb.
Maraqlıdır, Nuru paşa ilə bağlı müsabiqənin keçirilməsinə media təmsilçiləri necə baxır?
"Xalq Cəbhəsi" qəzetinin baş redaktoru Elçin Mirzəbəyli belə bir müsabiqənin keçirilməsinə müsbət prizmadan yanaşdığını bildirdi: "Belə bir müsabiqənin keçirilməsinə normal baxırım. Bunun bir tarix olduğunu hamı bilməlidir. Digər tərəfdən, Nuru paşa ilə bağlı müsabiqənin keçirilməsi Azərbaycan-Türkiyə əlaqələrinə növbəti töhfə verərdi. Eyni zamanda, Qafqaz İslam Ordusunun Azərbaycandakı fəaliyyəti, tarixi hadisələrin bir daha ictimaiyyətin diqqətinə çatdırılmasına yardım göstərərdi. Qənaətimcə, bu çox önəmli bir təklifdir və o üzdən bunu birmənalı şəkildə dəstəkləyirəm".
"Şərq" qəzetinin baş redaktoru Akif Aşırlı da buna müsbət prizmadan yanaşdığını bildirdi: "Tamamilə doğru və düzgün təklifdir. Bu, həyata keçirilsə, xalq üçün, Türkiyə-Azərbaycan münasibətləri üçün əhəmiyyəti olar. Nuru paşa Azərbaycanın istiqlal savaşına qatılan, ölkənin ərazi bütövlüyü uğrunda 6 ay savaş aparmış bir komandandır. Onu biz həm Türkiyənin, həm də Azərbaycanın oğlu hesab edirik. O nə qədər Türkiyə istiqlalına önəm veribsə, bir o qədər də Azərbaycan istiqlalına önəm verib. Ona görə də Nuru paşa ilə bağlı müsabiqə təklifi mütərəqqi haldır. Belə bir müsabiqənin keçirilməsi çox yaxşı olardı. Hesab edirəm ki, lazımlı bir addımdır. Həm tarixmiz, həm də Türkiyə-Azərbaycan münasibətlərinin inkişafı, bugünkü durumumuz və gələcəyimiz üçün bu önəmli bir mövzudur". Vidadi ORDAHALLI
