"Bundan əvvəlki səsvermələrlə müqayisədə müşahidəçilərin sayında bir qədər artım var"
Referendumda müşahidə aparmaq üçün Mərkəzi Seçki Komissiyasında (MSK) 846 müşahidəçi qeydiyyatdan keçib. Bunu MSK sədri Məzahir Pənahov bildirib. MSK-da qeydiyyatdan keçən müşahidəçilərdən 598 nəfəri 2 QHT-nin müşahidəçisidir, 2 nəfər xüsusi icazə ilə, qalanları öz təşəbbüsü ilə qeydiyyatdan keçib.
Seçki dairələrində isə 37 429 müşahidəçi qeydiyyatdan keçib. Onlardan 22481 nəfəri öz təşəbbüsü ilə qeydiyyatdan keçib. Onlardan 881 nəfəri QHT-nin müşahidəçisidir. "Yeni Azərbaycan" təşviqat qrupunun 4410, "Vətəndaş Cəmiyyəti" təşviqat qrupunun 3024, "Bələdiyyə" təşviqat qrupunun 4577 müşahidəçisi qeydiyyatdan keçib. Qalan müşahidəçilər siyasi partiyaların təmsilçiləridir.
Seçki dairələri üzrə 37 mindən artıq müşahidəçinin qeydiyyatdan keçməsi referendumun effektiv müşahidəsi üçün yetərlidirmi?
Qeyri-hökumət təşkilatı rəhbəri Hüseyn Həmidovun sözlərinə görə, Azərbaycanda keçirilən seçkilər zamanı müşahidəçilərlə bağlı hansısa problem yaşanmayıb: "Hər zaman müraciətlərə baxılıb. Prosedura uyğun gələn şəxslərə müşahidəçi statusu verilib. Bu, beynəlxalq müşahidəçilərlə də bağlı belə olub.
İndiyə qədər keçirilən seçkilərin legitim şəkildə tanınmasının bir amili də məhz müşahidəçilər üçün yaradılan şəraitlə bağlıdır. Çünki seçkinin sonunda müşahidəçilərin də rəyi əsas götürülür. Ötən seçkilərdə bəzi beynəlxalq missiyalar astronomik müşahidə sayı təklif etdi. Bu heç bir normaya sığmadığı üçün Azərbaycan tərəfi qəbul etmədi. Buna baxmayaraq, ən nüfuzlu missiyalar seçkini müşahidə edərək öz rəyini verdi. Yəni demək istədiyim budur ki, kimlərinsə prosesdə müşahidəçi qismində iştirak etmək istəməməsi nəyisə dəyişən deyil. Bu birmənalıdır. Bu vəziyyətdə də müxalifətin referendumu boykot etməsinin heç bir əsası olmur. Əgər sənin boykotun heç bir nəticəyə təsir etmirsə və beynəlxalq aləmdə, daxili ictimai rəydə seçkinin legitimliyini şübhə altına salmırsa, ən azından, seçkidə iştirak edib mövqelərini gücləndirməli, xalqla daha çox ünsiyyətdə olmağa çalışmalısan. MSK-nın açıqladığı rəqəmlər qənaətbəxşdir. Seçkini müşahidə təcrübəsi olan bir adam kimi deyə bilərəm ki, açıqlanan rəqəmlər referendumun effektiv müşahidəsi üçün yetərlidir. Bundan əvvəlki səsvermələrlə müqayisədə hələ müşahidəçilərin sayında bir qədər artım var".
Məhəmmədəli QƏRİBLİ
