Azərbaycan Nəqliyyat, Rabitə və Yüksək Texnologiyalar Nazirliyi (NRYTN) yanında Elektron Təhlükəsizlik Xidməti elektron poçt üzərindən həyata keçirilən daha bir “fişinq” kampaniyasını qeydə alıb. Məlum olub ki, vətəndaşlara hərbi təlimlərlə bağlı saxta mesajlar göndərilir .
Nazirlikdən mətbuata verilən məlumata görə, vətəndaşlara elektron poçt üzərindən göndərilən saxta məktublarda guya Azərbaycan, Türkiyə və Gürcüstan hərbi qulluqçularının iştirakı ilə müxtəlif hərbi təlimlərin keçirildiyi bildirilir. Qeyd olunur ki, həmin təlimləri canlı izləmək üçün Dövlət Mülki Aviasiya Agentliyi Müdafiə Nazirliyi ilə birlikdə “Sarsılmaz qardaşlıq – 2021” proqramını hazırlayıb. Saxta məktubda həmin proqramın Nəqliyyat, Rabitə və Yüksək Texnologiyalar Nazirliyi tərəfindən təsdiq edildiyi vurğulanır.
Daha sonra istifadəçidən saxta məktuba əlavə edilən keçidə daxil olması və proqramı yükləməsi istənilir. Həmin keçiddə isə zərərverici proqramlar yerləşdirilir və keçidə daxil olub proqramı yükləyən istifadəçinin cihazı yoluxur.
Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Xidməti vətəndaşlara bildirir ki, bu məlumatlar həqiqəti əks etdirmir. Məqsəd müxtəlif sosial mühəndislik texnikalarından istifadə edərək istifadəçiləri zərərli keçidlərə daxil olmağa vadar etməklə cihazlarını yoluxdurmaq və fərdi məlumatlarını ələ keçirməkdir.
Vətəndaşlara tövsiyə olunur ki, bu kimi məlumatlara etimad etməsinlər. İlk öncə fərqli əlaqə vasitələrindən istifadə etməklə məktubun göndərildiyi ünvanı və məlumatların düzgünlüyünü rəsmi mənbədən yoxlasınlar. Tanımadıqları şəxslərdən göndərilən heç bir keçidə daxil olmasınlar və hər hansı faylı yükləməsinlər.
Vətəndaşlara hərbi təlimlərlə bağlı saxta mesajlar haradan göndərilə və bu təxribatın arxasında hansı qüvvələr dayana bilər?
“Bu dövlətlərdən Azərbaycana qarşı ciddi informasiya təhdidləri gəlir”
Tanınmış hərbi ekspert İbrahim Rüstəmli bizimlə söhbətində bildirdi ki, bu birbaşa informasiya təhlükəsizliyi ilə bağlı məsələdir. “Müharibə başa çatsa da, informasiya müharibəsi hələ davam edir və baş verənlər də informasiya təhlükəsizliyi ilə bağlıdır. Biz 44 günlük müharibədə həm də soyuq müharibə cəbhəsində qələbə qazandığımız üçün qalib gəldik. Bu qələbənin təmin edilməsində Azərbaycan Prezidentinin müstəsna xidmətləri olub. Bütün dövlərdə informasiya savaşı həmişə böyük önəm daşıyıb, bu həmişə həlledici, müəyyənedici şəkildə özünü təqdim edib. Ona görə də, ilk növbədə bu sahəyə ciddi diqqət yetirmək, obrazlı şəkildə desək, yeni müdafiə sistemləri yaratmaq lazımdır. Azərbaycanın qələbəsini qısqanclıqla qarşılayan bir çox dövlətlər var, o dövlətlərin də bir qismi də Azərbaycanla birbaşa qonşuluqda yerləşir. Bu dövlətlərdən Azərbaycana qarşı ciddi informasiya təhdidləri gəlir və biz bunu hər an hiss edirik. Biz açıq şəkildə KİV-də bunun nümunələrini görürük. Məsələn, Rusiyanın bir sıra telekanallarında açıq şəkildə Azərbaycanın Qarabağ savaşında əldə etdiyi qələbəyə qısqanc yanaşmalar müşahidə olunur. Digər qonşumuz İran tərəfdən də informasiya təhdidləri gəlir. Təbii ki, bunların arxasında ölkəmizin bugünkü mövqeyinə sarsıdıcı zərbə vurmaq niyyəti dayanır. Ona görə də, biz hazırda baş verənlərlə bağlı danışarkən informasiya təhlükəsizliyi haqda danışırıq. Bu savaşda qələbə qazanmağımız üçün informasiya resurslarımızdan düzgün istifadə etməyimizə çox böyük ehtiyac var. İnformasiya təhlükəsizliyi kadrlarına zərurət böyükdür. Vətəndaşlara hərbi təlimlərlə bağlı saxta mesajlar göndərilməsi xalqda panika, şübhə, tərəddüd yaratmaq məqsədinə xidmət edir. Bu birmənalı şəkildə belədir. Təlimlərlə bağlı göndərilən saxta mesajlar xüsusilə dövlətin aparıcı şəxsinin, yəni cənab Prezidentin KİV-də çıxışlarında inamla bildirdiyi fikirlərə şübhə yaratmaq və xalqın dövlətə, xüsusən dövlət başçısına olan inamını sarsıtmaq məqsədi güdür”.
İ.Rüstəmli dedi ki, indiki məqamda bu cür informasiya təhdidlərinin olması təbiidir, ancaq bizim bu məsələ ilə bağlı çiynimizə çox böyük məsuliyyət düşür. O bildirdi ki, informasiya resurslarımızı düzgün yönəltməli və informasiya təhlükəsizliyi sahəsində çalışan kadrlarımızın peşəkarlığını artırmalıyıq.
İradə SARIYEVA
