Məlum olduğu kimi, Azərbaycanda pandemiya ilə bağlı həyata keçirilən tədbirlər çərçivəsində bir sıra sahələrlə yanaşı, insanların toplaşdıqları ibadət yerlərində, məscidlərdə kütləvi ibadətlərin keçirilməsi təxirə salınıb. Bu, birbaşa epidemioloji vəziyyətlə əlaqədar olan məsələdir. Məscidlər və ibadət yerləri də daxil olmaqla, insanların kütləvi bir məkana toplaşması yoluxma ehtimalını artırır.
Sirr deyil ki, koronavirusun kökünün tam kəsilmədiyi bir vaxtda məscidlərdə kütləvi namaz qılınmasının böyük pandemik təhlükəsi var. Kütləvilik olan yerdə sosial məsafəni qorumaq, ümumiyyətlə, mümkün deyil, bu da sözsüz ki, virusun yayılmasına geniş şərait yarada bilər.
Bildiyimiz kimi, avqustun 21-də Məhərrəm ayı başlayır və əvvəlki illərdən fərqli olaraq, bu dəfə Azərbaycanda məscidlərdə dini ayinlərin kütləvi formada keçirilməsinə pandemiya səbəbindən məhdudiyyət qoyulub.
Bu ilin əvvəlində dünyada yayılan COVID-19 virusu məktəblərin bağlanmasına, toy, nişan, ad günü və yas mərasimlərinin təxirə salınmasına səbəb olub. Eyni zamanda, qeyd etdiyimiz kimi, koronavirusun geniş yayılmaması, bu xəstəliyə görə ölən insanların sayının artmaması üçün qapalı məkan olan və insanların kütləvi toplaşdığı məscidlərin də fəaliyyəti müvəqqəti olaraq məhdudlaşdırılıb.
“Pandemiya risqini nəzərə alaraq, əhalinin təhlükəsizliyinin təmin edilməsi üçün məscidlərimizdə kütləvi ibadətlərin, tədbirlərin təxirə salınması daha məqsədəuyğun sayılır”
Qafqaz Müsəlmanları İdarəsinin (QMİ) sədr müavini, fəlsəfə üzrə fəlsəfə doktoru Hacı Fuad Nurullayev baki-xeber.com-a açıqlamasında bildirdi ki, indiki şəraitdə məscidlərimizdə kütləvi namaz mərasimlərinin keçirilməsi böyük pandemik təhlükələrə səbəb ola bilər, odur ki, pandemiya bitənə qədər məscidlərdə kütləvi ibadətlərin təşkil edilməsi müvəqqəti olaraq təxirə salınıb. “Nazirlər Kabineti yanında Operativ Qərargahın rəsmi qərarına əsasən, bütün kütləvi mərasimlərin keçirilməsi təxirə salınıb. Yəni pandemiya ilə əlaqədar olaraq toyların, nişan mərasimlərinin və sair tədbirlərin keçirilməsi dayandırılıb. Bütün bu tədbirlər virusun yayılmasının qarşısının alınması üçün görülüb. Kütləvi mərasimlərdə çoxlu sayda insan iştirak edir, onlar kütləvi şəkildə namaz qılır, ayinlər icra edirlər. Ona görə də ibadət yerlərində insanların virusa yoluxmaması üçün məscidlərdə kütləvi ibadətlərin, ayinlərin icra edilməsi dayandırılıb. Bu, yoluxma hallarının qarşısının alınması üçün daha məqsədəuyğundur.
Bilirsiniz ki, qarşıdan Məhərrəm ayı gəlir. Pandemiya vəziyyətində məscidlər ibadətlərə açılarsa, Məhərrəm ayı ilə bağlı ibadət etmək, namaz qılmaq, ayinlər icra etmək üçün yüzlərlə insan məscidlərə gələ və bu amil də virusun yayılması ilə bağlı təhlükə yarada bilər. Bu səbəbdən də virusun yayılmasının qarşısının alınması və bu istiqamətdə yarana biləcək təhlükənin qabaqlanması üçün məscidlərdə kütləvi ibadətlər təxirə salınıb”.
QMİ sədrinin müavini qeyd etdi ki, məscidlərdə kütləvi ibadətlərin, cümə və camaat namazlarının, eləcə də ayinlərin təxirə salınması müvəqqəti xarakter daşıyır. Müsahibimiz onu da vurğuladı ki, nə qədər pandemiya davam edəcəksə, biz bu məsələdə bir o qədər ehtiyatlı olmalıyıq. “İnşallah, dünyada pandemiyanın qarşısı tam alındıqdan və bu bəla sovuşduqdan sonra insanlar rahat şəkildə gedib məscidlərdə ibadətlərini edərlər, toylarını, ad günlərini, kütləvi mərasimlərini keçirərlər. Amma pandemiya risqini nəzərə alaraq, əhalinin təhlükəsizliyinin təmin edilməsi üçün məscidlərimizdə kütləvi ibadətlərin, tədbirlərin təxirə salınması daha məqsədəuyğun sayılır”.
QMİ sədrinin müavini bildirdi ki, bu gün dindarlar evlərində ibadətlə məşğul ola və onlayn şəkildə insanlarla əlaqə yarada bilərlər. Onun sözlərinə görə, onlar onlayn şəkildə dini söhbətlər etməklə əhaliyə öz faydalı tövsiyələrini verə bilərlər. “Biz də istəyirik ki, insanlar yoluxmasın, fəsadlar baş verməsin, ölməsinlər. İnsan ölümü çox dəhşətlidir və Quran da buyurur ki, öz əlinlə özünü təhlükəyə atma. Bir insanı öldürmək bəşəriyyəti öldürmək, bir insanı diriltmək bəşəriyyəti diriltmək deməkdir. Ona görə də biz Quranın və Peyğəmbərin buyurduqlarını əsas götürərək bu addımı atırıq. Müvəqqəti olaraq bu ayinlərin, xüsusən də namaz və digər kütləvi mərasimlərin keçirilməsi hələ ki, təxirə salınıb. İnsan öz evində namazını qıla, ibadətini edə, ayini icra edə bilər, sadəcə, bu məsələdə kütləvilik təmin edilə bilməz. Bunun da səbəbi virusun yayılması, insanların həyatının təhlükədə olmasıdır. Dinimiz də onu deyir ki, təhlükəyə getməyin, dayanın və səbrli olun. Ruhanilər, din xadimləri, mərsiyə deyənlər internet imkanlarından istifadə edərək milyonlarla insana öz fikirlərini onlayn şəkildə çatdırsınlar, öz nitqlərini, söhbətlərini yayıb insanları maarifləndirsinlər. Onlar onlayn şəkildə də dinlə bağlı faydalı məlumatlar verə bilərlər” - deyə QMİ sədrinin müavini qeyd etdi.
İradə SARIYEVA
