Türkiyənin terrorla mübarizəsini kölgələmək üçün PKK və törəmələri yerinə israrla “kürdlər” deyilməsinə və ölkənin kürdlərlə problemi varmış kimi təqdim edilməsinə İraq Kürd Regional Rəhbərliyinin Baş naziri Necirvan Bərzani də qarşı çıxıb.
Baki-xeber.com-un xəbərinə görə, Ərbildəki Yaxın Şərq Araşdırma İnstitutu (MERI) tərəfindən təşkil edilən bir paneldə Suriya və PKK ilə əlaqədar çıxışında Türkiyənin Suriya kürdləri ilə hər hansı bir problemi olmadığını vurğulayan İraq Kürd Regional Rəhbərliyinin Baş naziri Necirvan Bərzani “Türkiyənin əvvəldən bəri Suriyadakı kürdlərlə bir problemi yoxdur, sadəcə PKK ilə var” deyib.
Bərzani Türkiyə tərəfinin “Biz heç bir şəkildə Suriya ilə sərhədlərimizdə PKK əsgilərini həzm edə bilmərik" mövqeyinin ona çatdırıldığını bildirib, qeyd edib ki, “Bunun Suriyadakı qardaşlarımız üçün də böyük bir təhlükə olduğunu söyləməyə çalışdıq”.
PKK-nın Suriyadakı mövcudluğuna reaksiya göstərən Bərzani eyni zamanda qeyd edib ki, “Yeganə istəyimiz kürdlərin PKK ilə aralarına məsafə qoymalarıdır. PKK özünü Suriya kürdləri vasitəsilə legitimləşdirmək istədi və təəssüf ki, nəticədə bu gün bu nöqtəyə gəlib çıxıldı”.
Məlum olduğu kimi, başda ABŞ, Avropa və Rusiya olmaq üzrə bəzi ölkələr Türkiyənin PKK terroruna qarşı mübarizəsilə bağlı açıqlamalarında PKK yerinə şüurlu şəkildə “kürdlər" ifadəsini istifadə etməkdədir. Sözügedən mövqe Türkiyənin cənub sərhədində yaradılmağa çalışılan terror dəhlizini yox etmək, bölgəyə sülh və əminamanlıq gətirmək məqsədilə başlatdığı “Sülh Çeşməsi” əməliyyatı prosesində də davam edir. Məsələ ilə bağlı Türkiyənin Bakıdakı Səfirliyinin Mətbuat Müşavirliyindən verilən açıqlamada deyilir:
PKK-nın Türkiyə kimi ABŞ və Avropanın da terror təşkilatları siyahısında yer almasına baxmayaraq, nümayiş etdirilən bu davranış ölkəmizin bu gün də davam etdirdiyi və son 30 illik terrorla mübarizə prosesini təhrif edir. Suriya və İraqdakı müharibədən qaçan kürdlər Türkiyəyə sığınır, ölkəmiz etnik mənşə, din və məzhəb ayrıseçkiliyi etmədən vətəndaşlara qucaq açır. Həmçinin kürd əsilli vətəndaşlar, Türkiyənin terrorla mübarizəsi əsnasında PKK-nın hərəkət etdiyi ərazilərdən qaçır. Bu vəziyyət Türkiyənin mübarizəsinin kürdlərlə deyil, PKK və törəmələri olan SDG/PYD/YPG adı altında fəaliyyət göstərən terror təşkilatları ilə olduğunun vacib sübutlarından biridir. Türk Silahlı Qüvvələri “Sülh Çeşməsi” əməliyyatı zamanı Aİ və NATO tərəfindən də terror təşkilatı kimi qəbul edilən PKK-nın Suriya qanadı olan PYD/YPG ünsürlərini və onlara aid sığınacaq, mövqe, silah, avadanlıq və materialları hədəf alıb.
PYD/YPG terror təşkilatının münaqişənin əvvəlindən bu yana, kürdlər başda olmaqla, bölgə xalqına qarşı təzyiq və qorxutma siyasəti apardığı, yerli xalqı zorla evlərindən didərgin saldığı göz qabağındadır. PYD/YPG-nin etnik təmizləmə başda olmaqla insanlığa qarşı törətdiyi cinayətlər, müstəqil beynəlxalq təşkilatlar tərəfindən də rəsmiləşdirilib.
Baki-xeber.com
