Demokratların ABŞ prezidentliyinə namizədi Hillari Klinton deyib ki, Donald Tramp Kreml və onun müttəfiqlərilə bütün münasibətləri barədə açıqlama verməlidir. Klintonun fikrincə, rus hakerlərinin ABŞ-ın seçki sənədlərinə müdaxiləsi bu əlaqələrin nəticəsi ola bilər.
Baki-xeber.com xəbər verir ki, Birləşmiş Ştatlar Rusiyanı seçkiyə müdaxilədə, səsvermənin nəticələrinə təsir etmək cəhdində günahlandırır. Klinton deyib ki, məhz Rusiya ilə və Rusiya prezidentinə yaxın olan rus oliqarxlarla münasibətlərinə görə, Kreml respublikaçıların namizədi Donald Trampın seçilməsinə çalışır: «Amerika xalqı bu münasibətlərin dərəcəsini və bunun rusların seçkiyə müdaxiləsilə əlaqəsi olub-olmadığını öyrənməlidir».
Respublikaçıların namizədi D.Tramp isə Klintonun bu cür ittihamlarını hər dəfə rədd edib, Rusiyada sərmayə qoymadığını bildirib.
Hakerlərin seçki sənədlərinə müdaxiləsilə bağlı ittihamları Putin də rədd edib.
Bu arada Hillari Klintonun kampaniyası Federal Təhqiqatlar Bürosunun (FTB) direktoru Ceyms Komini namizədin e-maillərilə bağlı yeni təhqiqatda açıq-aşkar ikili standartlara yol verməkdə ittiham edib. "ABŞ kəşfiyyatı əmindir ki, Rusiya hökuməti ABŞ şəxsləri və təşkilatları, o cümlədən, ABŞ siyasi təşkilatları tərəfindən göndərilmiş məktublara müdaxilə edib… Bu oğurluqlar və ifşa olunmalar ABŞ seçki prosesinə müdaxilə etmək üçün nəzərdə tutulub" - bəyanatda bildirilib.
Klintonun seçki kampaniyasının meneceri isə Komini Hillari Klintonun tərəfdarlarına tətbiq etdiyi standartları Trampın tərəfdarlarına da tətbiq etməyə çağırıb.
Kampaniya bəyanatı ABŞ kütləvi informasiya vasitələrinin Kominin Rusiyanın ABŞ seçkilərinə müdaxiləsi, o cümlədən e-maillərə haker hücumuna görə, ictimai ittihama qarşı olması ilə bağlı xəbərlərindən sonra verib. Məlumata görə, cənab Kominin narahatlığı informasiyanın məhz seçkilərin yaxınlaşdığı vaxtda yayılması ilə bağlıdır. Onun imzalamaqdan imtina etdiyi bildirilən bəyanat, oktyabrın 7-də Milli Təhlükəsizlik Nazirliyi və Milli Kəşfiyyat Direktoru İdarəsi tərəfindən yayımlanıb. Komi bəyanatla razılaşıb, lakin seçkilərdən əvvəl ictimailəşdirilməsini istəməyib.
İddialar var ki, rus hakerlər seçki nəticələrini Trampın xeyrinə dəyişmək üçün Demokratları hədəfə alıb.
Komi cümə günü seçkilərə 11 gün qalmış FTB-nin xanım Klintonun şəxsi elektron poçt serveri ilə bağlı araşdırması ilə əlaqəli olduğu ehtimal edilən yeni elektron məktubları araşdırdığını élan etdikdən sonra sərt reaksiya ilə üzləşib.
Qeyd edək ki, Klintonun vəkilləri Dövlət Departamentinə 30 min işlə əlaqəli e-mail təqdim edib. Ancaq onun kampaniyası 33 min mesajı silib. Onlar bildirir ki, silinən e-maillər şəxsi xaraker daşıyıb.
Cənab Komi iyul ayında xanım Klintonun məxfi informasiyanın öhdəsindən gəlməkdə "son dərəcə ehtiyatsız" olduğunu deyib. O, heç bir ittiham üçün əsas olmadığını da qeyd edib. Lakin cümə günü, o, Konqresə bildirib ki, əvvəlki sorğusuna"münasib" ola biləcək təzə məktublar barədə öyrənib və FTB araşdırması yenidən başlayıb.
Tramp isə bildirib ki, FTB itkin düşmüş məktubların mənbəyini tapacaq. Tramp ümid edib ki, Demokrat namizədin 33 min silinmiş e-maili bərpa ediləcək. Ancaq Klinton gizlətməyə heç nəyinin olmadığını deyib. Komi və baş prokuror Loretta Lynch qeyd ediblər ki, onlar yeni tapılmış elektron məktublar üzərində işləyirlər.
Bundan əvvəl prezident Barak Obamanın mətbuat katibi bildirib ki, prezident Kominin bəyənatı ilə gizlicə seçkilərə təsir göstərmək istədiyindən şübhələnmir. Onun sözlərinə görə, Ağ Ev FTB qərarını nə müdafiə edəcək, nə də tənqid edəcək.
ABŞ-da prezident seçkiləri noyabrın 8-də keçiriləcək.
TAHİR
