Rusiya özünün yeni nüvə raketinin görüntülərini ilk dəfə dərc edib. Bu raketin zərbəsi, deyilənlərə görə o qədər güclüdür ki, Birləşmiş Krallıq və Fransanı Yer üzündən silə bilər.
Baki-xeber.com xəbər verri ki, RS-28 Sarmat istilik-nüvə başlıqlı raketləri 2011-ci ildə sifariş edilib və 2020-ci ildə ordunun istifadəsinə veriləcək.
İndiyədək məxfi saxlanan bu nəhəng raket Qərb hərbiyyəsi tərəfindən "Şeytan-2" ( Satan 2 ) adlandırılıb, çünki 1970-ci illərdə buraxılmış RS-36M raketlərini NATO rəsmiləri "Şeytan" raketi adlandırmışdılar.
Rusiya hökumətinin nəzarətində olan “Sputnik” internet saytı may ayında dərc etdiyi məqalədə yazırdı ki, bu raket " ABŞ-ın Texas ştatı və ya Fransa böyüklüyündə ərazini" tamamilə dağıtmaq gücündədir. Sayt qitələrarası ballistik raketin qlobal strateji tarazlığı dəyişdirmək üçün qurulan raketdən müdafiə sistemlərinə cavab olaraq hazırlandığını yazır.
Rusiya Müdafiə Nazirliyindən bildirilib ki, raketdəki döyüş başlığı Şimal və Cənub qütbləri arasındakı hədəfləri məhv edə biləcək gücə sahibdir.
İstehsalına 2018-ci ildə başlanması planlaşdırılan 100 ton ağırlığında olan RS-28 “Sarmat” raketi dünyanın istənilən nöqtəsinə 10 ton nüvə yükü daşıya bilər. "The Telegraph" yazır ki, “Sarmat” raketi Hirosima və Naqasakiyə atılmış atom bombalarından 2000 dəfə güclü partlayış verə bilər. TASS agentliyi isə raketin 11 min kilometrdən çox məsafəni qət edə biləcəyini yazır.
Bəzi məlumatlara görə, Rusiya səsdən iti uçan nüvə başlığını aprel ayında sınaqdan çıxarıb. "Şeytan-2" raketlərinə məhz bu başlıqların keçiriləcəyi güman edilir. O da xəbər verilir ki, sözü gedən raketi radarla tutmaq mümkün olmayacaq, çünki onun uçuş trayektoriyası naməlum qalacaq. "Şeytan-2" raketinin "Şeytan-1"-dən daha sürətli uçacağı düşünülür.
Raketin baş konstruktorları V. Deqtyar və Y. Kaverinin bəyanatında deyilir ki, Sarmatın hazırlanması üçün sifarişi Kreml hələ 2011-ci ildə veribmiş. İlk raketin 2020-ci ildə ordunun istifadəsinə veriləcəyi gözlənilir. Bəyanatda deyilir ki, bu raketlər Rusiya strateji qüvvələri tərəfindən çəkindirici vasitə kimi istifadə olunacaq.
