NATO-ya üzvü ölkələr Rusiyanın Suriyanın Tartus limanına doğru yola çıxan “Admiral Kuznetsov” təyyarə gəmisinin də aralarında olduğu gəmi karvanına yanacaq verilməməsi barədə razılığa gəlib.
Baki-xeber.com xəbər verir ki, Rusiya ötən həftə İspaniyaya Şimali Afrikadakı anklavı Seuta limanından yanacaq götürmək istədiyini bildirmişdi. İspaniyanın sentyabr ayında ilkin cavabında 3 rus gəmisinin 28 oktyabr-2 noyabr tarixləri arasında Seuta limanında yanacaq verilməsinə icazə verildiyi bildirilirdi. Ancaq sonrakı açıqlamada bu qərara yenidən baxıldığı qeyd edilirdi.
İspaniyanın bu addımına başda İngiltərə olmaqla NATO ölkələri sərt reaksiya verib. NATO üzvləri İspaniyanı Suriyaya yollanan Rusiya hərbi gəmilərinin yanacaqla təchiz olunmasına icazə verməməyə çağırıb. NATO bildirir ki, Rusiya hərbi gəmilərinin İspaniya anklavında yanacaqla təchiz olunması son dərəcə narahatedici addım olardı. Alyans narahatdır ki, Suriyaya üz tutan Rusiya hərbi gəmiləri Hələbdəki dinc əhalinin bombalanması üçün istifadə oluna bilər. "Narahatlıq bundan ibarətdir ki, “Kuznetsov” təyyarə gəmisi Hələbdəki mülkilərə qarşı hava zərbələrini artırmaq üçün istifadə oluna bilər", - deyən NATO baş katibi Jens Stoltenberq bildirib.
Bu bəyanatlardan sonra İspaniya Xarici İşlər Nazirliyi Rusiyanın Madriddəki səfirliyinə NATO ölkələrindən gələn narahatlıqların çatdırıb və onlara gəmilərdən Hələb hücumlarında istifadə edilib-edilməyəcəyilə bağlı sorğu verib.
Madriddəki Rusiya səfirliyi isə donanmanın əvvəlcə Seuta limanından istifadə etmək istədiyini, ancaq sonradan bundan imtina edildiyini bildirib. Bununla Rusiyanın 3 hərbi gəmisinin Seuta limanına daxil olacağı barədə planlar ləğv olunub. Səfirlik planın dəyişməsi səbəbi barədə isə hər hansı bir açıqlama verməyib.
