Suriya prezidenti Bəşər Əsədin əmisi Rıfat Əsəd Fransada məhkəmə qarşısına çıxarılıb.
Baki-xeber.com-un xəbərinə görə, 79 yaşlı Əsəd korrupsiyada günahlandırılır. Məlumatlı mənbələrin yerli AFP agentliyinə bildirdiyinə görə, Rıfat Əsədə qarşı qanunsuz mənimsəmə və israfetmə, eyni zamanda vergi qanunvericiliyinin tələblərinin pozulması maddələrilə cinayət işi açılıb.
Xəbərdə o da deyilir ki, Əsəd barəsində ittiham əslində 2013-cü ildə antikorrupsiya araşdırmaları ilə məşğul olan “Transparency International Sherpa” qeyri-hökumət təşkilatı tərəfindən verilib. Təşkilatın hesablamasına görə, Suriya prezidentinin əmisinin Fransadakı daşınmaz əmlakının dəyəri 160 milyon avro təşkil edir. Təşkilat bildirir ki, ölkəsindən sürgün edildiyi halda o, büdcədən qanunsuz gəlirlər əldə edib və həmin vəsaitlı də Parisdə 10-larla mənzil, habelə 45 hektar torpaq sahəsi alınmasına sərf edib.
Rıfat Əsəd isə barəsində deyilənləri inkar edir. Bildirir ki, 1980-ci ildə Səudiyyə Ərəbistanının şahzadəsi Abdulla Ərəbi qardaşı Hafiz Əsədə qarşı siyasi savaşı dəstəkləmək məqsədilə ona 15 milyon verib.
Xatırladaq ki, 1983-cü ildə Rıfat Əsəd qardaşı, o zamankı Suriya prezidenti Hafiz Əsədin xəstəliyindən istifadə edərək onu devirməyə cəhd edib, lakin cəhdi uğursuz olub. Bundan sonra o, ölkəni tərk etməyə məcbur olub və o vaxtdan da Avropada yaşayır.
